Другое места на абласным конкурсе заняла работа вучаніцы Забалацкай школы
Спакон вякоў кожная сям’я мела свае звычаі, традыцыі, святы, абярэгі. Менавіта гэтай тэматыцы была прысвечана даследчая работа «Лялькі» вучаніцы 7 класа Забалацкай сярэдняй школы Аліны Зеваковай.
З самастойна зробленай лялькай-абярэгам «Шчаслівіца» Аліна прыняла ўдзел у раённым конкурсе, а затым і абласным «Скарбы маёй сям’і» ў намінацыі «Ад прадзедаў спакон вякоў…». Сваю работу дзяўчынка абараняла на абласной онлайн канферэнцыі, дзе ёй было прысуджана другое месца. У далейшым гэта работа прыме ўдзел у рэспубліканскім этапе конкурсу.
– Я вельмі ўдзячна сваёй сям’і, дзе мне пашчасціла нарадзіцца, у якой мае бацькі, Святлана Уладзіміраўна і Міхаіл Леанідавіч, выхоўваюць і любяць нас з братамі Мікітам і Міхаілам, – гаворыць дзяўчынка. – Вельмі задаволена і сваёй работай. Лялькі з тканіны – тое самабытнае, што мы маем ад нашых продкаў. Наша задача – не згубіць гэта. У абрадавай ляльцы закадзіравана жыццёва важная інфармацыя, а ключом да гэтага «кода» служаць агульначалавечыя каштоўнасці: працяг роду, здароўе, каханне, праца, жыццё… Нашы продкі верылі ў тое, што лялька «Шчаслівіца» – маленькая лялечка-прыгажунька – дапамагала чалавеку заўсёды заставацца шчаслівым. Яна была побач са сваім гаспадаром і ў дарозе, і дома. Вось і мая лялечка мне дапамагла.
Юлія КАПРАНАВА.
