Сельгасвытворцы не толькі вырабілі, а яшчэ і па-мастацку прэзентавалі сваю прадукцыю
Нягледзячы на тое, што багаты асартымент сельгаспрадукцыі можна на працягу ўсяго года без праблем набыць у шматлікіх універсальных крамах, спецыялізаваных гандлёвых кропках і на рынках, многія з нас прытрымліваюцца старой традыцыі і выдзяляюць на закупку агародніны, зерня, саджанцаў, мяса асобны дзень. Для такіх аматараў сумясціць прыемнае з карысным — папоўніць запасы на зіму і заадно прагуляцца ў людным месцы пад гукі мастацкай самадзейнасці — у мінулыя выхадныя ў Талачыне і Коханаве прайшлі кірмашы.
У суботу ў райцэнтры частку вуліцы Леніна і канцэртную пляцоўку насупраць райвыканкама запоўнілі імправізаваныя гандлёвыя кропкі суб’ектаў розных формаў уласнасці, розных маштабаў і з розных рэгіёнаў краіны — ад буйных сельскагаспадарчых і перапрацоўчых прадпрыемстваў да прадпрымальнікаў і рамеснікаў. Уладальнікі падсобных гаспадарак і дачнікі набывалі зерне для жывёлы і саджанцы, хатнія гаспадыні — садавіну і агародніну, свежае мяса, прыправы, гарбату, кандытарскія вырабы. Была прадстаўлена таксама сувенірная прадукцыя, адзенне і абутак. Пра мастацкую частку мерапрыемства паклапаціліся работнікі культуры, калектывы самадзейнасці і нават некаторыя сельгаспрадпрыемствы.
Напрыклад, УП «Талачынскі Элеватар-Агра», УП «Рыдамльскі», ААТ «Талачынскі райаграсэрвіс» вельмі творча падышлі да афармлення сваіх гандлёвых кропак, за што былі адзначаны падарункамі. Уручаючы іх на сцэне канцэртнай пляцоўкі, намеснік старшыні райвыканкама Альхімовіч В. А. асабліва адзначыў творчы падыход да ўдзелу ў кірмашы ААТ «Талачынскі райаграсэрвіс»: яго прадстаўнікі былі апрануты ў нацыянальныя касцюмы, заклікалі пакупнікоў, забаўлялі танцамі і нават прапаноўвалі пачаставацца блінамі.
Не менш маштабнае і вясёлае мерапрыемства адбылося назаўтра ў Коханаве. У прыватнасці, як паведаміў старшыня сельвыканкама Барышаў М. Я., сваю прадукцыю прапанавалі жыхарам і гасцям гарпасёлка ўсе сельгаспрадпрыемствы, якія дзейнічаюць на тэрыторыі Савета, а таксама суб’екты гаспадарання розных арганізацыйных формаў (фермеры, мясакамбінат, хлебазавод і інш.) з Брэстчыны і Магілёўшчыны, Аршанскага і Лепельскага раёнаў Віцебшчыны. Тут, як і ў Талачыне, таксама можна было набыць шырокі асартымент харчовых і прамысловых тавараў, саджанцы, зерне (усё нават не раскупілі), сувеніры і прылады побыту (рамесніцкія вырабы). Мастацкае суправаджэнне забяспечыў Коханаўскі гарпасялковы Дом культуры.
Надвор’е паспрыяла абодвум кірмашам, хаця ў Талачыне на працягу некалькіх хвілін людзей папалохаў лёгкі дожджык.
Сяргей АБРАМОВІЧ.