Міжнародны Дзень роднай мовы — нагода для творчасці і паглыблення ведаў
Гэтую дату прынята адзначаць не толькі строга ў адпаведнасці з календаром, непасрэдна 21 лютага, а і напярэдадні — шэрагам мерапрыемстваў, якія звычайна складваюцца ў цэлы Тыдзень роднай мовы.
Так, Нацыянальная акадэмія навук Беларусі сёлета з 13 па 21 лютага праводзіць Тыдзень беларускай мовы і літаратуры. У праграме значацца такія мерапрыемствы, як прэзентацыі друкаваных выданняў, сустрэчы з пісьменнікамі і мовазнаўцамі, прэс-канферэнцыя і інш. Не адступіў ад гэтага звычаю і Талачынскі раён — установы адукацыі і культуры падрыхтавалі для сваіх наведвальнікаў разнастайныя акцыі культурнага, забаўляльнага, асветніцкага, патрыятычнага характару.
Напрыклад, у школах на гэтым тыдні прайшоў першы (школьны) этап штогадовага раённага фестывалю «Паэтычны ветразь». Мерапрыемства арганізоўваецца ў форме конкурсу выканальніцкага і акцёрскага майстэрства і заўсёды прымяркоўваецца да Дня роднай мовы (сёлета раённы этап, як паведамілі ў раённым вучэбна-метадычным кабінеце, плануецца на сакавік).
Калектыў раённай бібліятэкі падрыхтаваў у чытальнай зале выставу «Слава кніжцы беларускай!», на якой прадстаўлены выданні, звязаныя з беларускім пісьменствам пачынаючы ад часоў Францыска Скарыны.
А 16 лютага бібліятэка запрасіла сямікласнікаў СШ №2 на турнір беларусазнаўцаў «Размаўляй, пішы, твары па-беларуску». Дзецям былі прапанаваны інтэлектуальныя і творчыя заданні, сярод якіх — звязаныя з этнаграфіяй, скорагаворкамі, прыказкамі і прымаўкамі і інш.
Сяргей АБРАМОВІЧ.
