Каталіцкія вернікі Талачына сустрэлі Вялікдзень
У гэтую нядзелю каталіцкія вернікі сустрэлі адно з самых вялікіх, светлых і радасных свят — Вялікдзень, Уваскрашэнне Хрыста.
У Вялікую суботу асвяцілі пасхальныя стравы, прыгатаваныя на святочны стол пасля Вялікага паста. Позна вечарам па старадаўняй традыцыі на двары перад касцёлам запалілі велікодны агонь, як сімвал Божага святла. Ад асабовай свечкі Пасхала агонь раздалі ўсім прысутным вернікам. На святочнай літургіі адбылося аднаўленне хросту. На заканчэнні вернікі з запаленымі свечкамі прайшліся з песнямі працэсіяй вакол храма.
І вось настаў радасны дзень, калі хрысціяне ўсклікнулі: Хрыстос уваскрос! Сапраўды ўваскрос!
Няхай жа пакуты Езуса на крыжы дзеля нашага збаўлення адновяць людзей, навярнуць да дабра і спакою ва ўсім свеце!