Талачынскія меліяратары адзначылі дзве знакавыя даты (+відэа)
На наступным тыдні, у першую нядзелю чэрвеня, адзначаць сваё прафесійнае свята беларускія меліяратары. А ў талачынскіх прадстаўнікоў гэтай галіны сёлета яшчэ і юбілей: 1 лютага 1972 года створаны Талачынскі будаўніча-мантажны ўчастак Высоцкага будаўніча-мантажнага ўпраўлення, які з’яўляецца папярэднікам сённяшняга Талачынскага прадпрыемства меліярацыйных сістэм. Але зімою святкаванне юбілею ў сувязі з асаблівасцямі эпідэміялагічнай сітуацыі вырашана было перанесці бліжэй да Дня меліяратара. І вось нарэшце ўрачыстасць адбылася — сёння ў раённым Цэнтры культуры і народнай творчасці.
На свята былі запрошаны ветэраны (на здымку) і былыя кіраўнікі Талачынскага ПМС, кіраўнікі меліярацыйных прадпрыемстваў з Віцебска, Чашнікаў, Дуброўна, прадстаўнікі райвыканкама і райкама прафсаюза работнікаў АПК. Калектыў павіншавалі яго цяперашні дырэктар Уладзімір Лемешаў, галоўны бухгалтар дзяржаўнага прадпрыемства «Віцебскмеліявадгас» — кіруючая кампанія холдынга «ВітМелія» Пётр Страмужэўскі, старшыня райкама прафсаюза работнікаў АПК Таццяна Пільшчыкава, былыя кіраўнікі ПМС Сяргей Яшчук і Анатоль Бажко.
Дырэктар, многія спецыялісты і работнікі прадпрыемства адзначаны за працоўныя заслугі Ганаровымі граматамі. Акрамя таго, запрошаныя на свята госці ўручылі падарункі ўсяму калектыву, сярод якіх кустарэз, зварачны інвертар, мікрахвалевая печка. А дзіцячыя і дарослыя калектывы і сольныя выканаўцы Цэнтра культуры, Талачынскай і Коханаўскай дзіцячых школ мастацтваў парадавалі аўдыторыю канцэртнай праграмай.
Эпізоды свята — у відэароліку.
Сяргей АБРАМОВІЧ.