Каталіцкія вернікі Талачына адзначылі дзень Святога Антонія Падуанскага
13 чэрвеня каталіцкія вернікі штогод адзначаюць дзень Святога Антонія Падуанскага. Але сёлета гэты дзень асабліва ўрачысты. 790 год таму, у 1232 годзе, Папа Рымскі Грыгорый lX кананізаваў Святога Антонія за яго шматлікія цуды. Трэба адзначыць, што адбылося гэта цераз год пасля смерці святара.
Яшчэ адна памятная дата ў гісторыі касцёла прыпадае на гэты год. У 1992 годзе, цераз шэсць дзесягоддзяў пасля закрыцця касцёла, вернікі атрымалі дазвол ад райвыканкама на стварэнне каталіцкай суполкі, якая і была зарэгістравана.
Ва ўрачыстасці прыняў удзел біскуп Алег Будкевіч. Яго цёпла сустрэлі вернікі.
Касцёл Святога Антонія занесены ў спіс гісторыка- культурных каштоўнасцяў нашай рэспублікі. Будаваўся ён болей сарака гадоў на месцы спаленага французамі Ў 1812 годзе. І толькі ў 1854 годзе касцёл быў урачыста асвечаны магілёўскім біскупам Вацлавам Жыленскім.
Пасля рэвалюцыі храмы перажылі нялёгкія гады барацьбы з рэлігіяй. Не мінула гэтая барацьба і Талачын. У 1932 годзе касцёл быў закрыты. Пасля вайны ў ім знаходзіліся райпрамкамбінат, склады. І вось ужо 30 гадоў вернікі маюць магчымасць свабодна маліцца Богу. Парафія невялікая, але вернікі робяць усё магчымае, каб касцёл і тэрыторыя вакол яго былі як мага прыгажэйшымі.
Марыя ХМЯЛЮК.
Фота Віктар Ведзень / Catholic.by.