У Талачынскім гісторыка-краязнаўчым музеі адбылася сустрэча з мастачкай Галінай Цыдзік (г. Мінск)
У цяперашні час у музеі экспануецца выстава Галіны Цыдзік «Догоняя солнце» (56 работ), арганізаваная грамадскім аб’яднаннем культуры і мастацтва «Вечеря», і сёння аўтар (на здымках — у капелюшы), а таксама старшыня аб’яднання Сяргей Далгарукаў і загадчык кафедры гісторыі і тэорыі мастацтваў Беларускай дзяржаўнай акадэміі мастацтваў Яўген Шунейка сустрэліся з талачынскімі аматарамі выяўленчага мастацтва.
Мастачка расказала пра сябе, адказала на пытанні прысутных і правяла майстар-клас па маляванні акварэллю. Нарадзілася Галіна Цыдзік у 1967 годзе ў г.п. Мір Гродзенскай вобласці. З дзяцінства любіла маляваць і марыла стаць мастаком, але сур’ёзна займацца творчасцю пачала толькі ў сталым узросце. У 1989 годзе скончыла Гродзенскі дзяржаўны ўніверсітэт па спецыяльнасці квантавая фізіка, а ў 2019-м — Беларускую дзяржаўную акадэмію мастацтваў.
Выставу складаюць пейзажы і нацюрморты, прычым на большасці карцін прысутнічаюць кветкі. Не стаў выключэннем і майстар-клас — яго ўдзельнікам мастачка прапанавала намаляваць кветку цыкорыі.
Іншыя падрабязнасці пра творчасць Галіны Цыдзік і дзейнасць аб’яднання «Вечеря» шукайце ў адным з бліжэйшых нумароў газеты.
Сяргей АБРАМОВІЧ.
У Талачынскім гісторыка-краязнаўчым музеі адбылася сустрэча з мастачкай Галінай Цыдзік (г. Мінск),