Сёння ў Талачыне адзначылі 30-годдзе Беларускага саюза афіцэраў
Грамадскае аб’яднанне «Беларускі саюз афіцэраў» утворана ў верасні 1992 года (устаноўчы сход, на якім прынята рашэнне аб заснаванні БСА, адбыўся 20.09.1992). З нагоды юбілею сёння ў раённым Цэнтры культуры прайшло ўрачыстае мерапрыемства, у якім прынялі ўдзел члены талачынскай структуры БСА і іх родныя, прадстаўнікі раённай улады, педагагічнага і вучнёўскага калектываў Талачынскай СШ № 2 імя Героя Савецкага Саюза Мікалая Лугоўскага.
Старшыня талачынскай раённай структуры Беларускага саюза афіцэраў Аляксей Якіменка расказаў пра гісторыю ўзнікнення аб’яднання афіцэраў нашага раёна, пра яго ўдзел у грамадскім жыцці і патрыятычным выхаванні маладзі на сённяшнім этапе, уручыў членам арганізацыі юбілейныя медалі «30 лет БСО» (медалём адзначаны 15 чалавек, у тым ліку і сам Аляксей Антонавіч, які атрымаў яго на мінулым тыдні ў Віцебску — у ходзе аналагічнага мерапрыемства абласнога ўзроўню).
Старшыня раённага Савета дэпутатаў Георгій Мурашка (таксама член БСА) павіншаваў афіцэраў са знамянальнай датай ад імя райсавета, райвыканкама і ад сябе асабіста, уручыў членам арганізацыі Ганаровыя граматы і падзякі за актыўны ўдзел у грамадскім жыцці і ўклад у патрыятычнае выхаванне маладых пакаленняў.
Таксама ў ходзе мерапрыемства ўручаны членскія білеты пяці новым членам БСА.
Іншыя падрабязнасці — у газеце на наступным тыдні.
Сяргей АБРАМОВІЧ.
Сёння ў Талачыне адзначылі 30-годдзе Беларускага саюза афіцэраў,