Пажаданні жыхароў сельскай мясцовасці ўзяты на кантроль, прымаюцца меры
Чарговы Дзень Савета прайшоў 8 снежня. Прадстаўнікі райвыканкама, раённых службаў і арганізацый, прадпрыемстваў, дэпутаты раённага і Талачынскага сельскага Савета сустрэліся з насельніцтвам аграгарадка Райцы і вёсак Загараддзе, Мураўнічы, Навінка, Еўлахі, Плоскае, Маціёва, Слабодка, Стары Талачын, Коласава.
У той жа дзень у ходзе нарады, праведзенай пад кіраўніцтвам старшыні райвыканкама Ягорава С. В. і старшыні раённага Савета дэпутатаў Мурашкі Г. Г., былі агучаны і абмеркаваны ўсе пытанні, узнятыя грамадзянамі на сходах. Па абгрунтаваных зваротах службам, у кампетэнцыю якіх уваходзіць рашэнне адпаведных праблем, даручана прыняць меры. А вось суб’ектыўныя пажаданні, у аснове якіх ляжыць не відавочная і абгрунтаваная законам мэтазгоднасць, а толькі асабістае жаданне таго ці іншага асобна ўзятага грамадзяніна або групы грамадзян (напрыклад, устаноўка пункта прыпынку аўтобуса ў непрадугледжаным месцы, павелічэнне колькасці ліхтароў на вясковай вуліцы і інш.), зразумела, задаволены не будуць.
Вырашэнне некаторых праблем немагчымае па аб’ектыўных прычынах. Так, яшчэ ў верасні перад кіраўніцтвам раённага вузла электрасувязі было пастаўлена пытанне аб дрэннай якасці тэлефоннай сувязі ў адной з вёсак з выкарыстаннем бесправадной тэхналогіі (сітуацыя, калі ў сельскай мясцовасці падключэнне стацыянарнага тэлефона да правадной сеткі “Белтэлекама” ажыццяўляецца праз эфір, прадастаўлены кампаніяй “МТС”). На гэты конт, як паведаміў начальнік вузла Паўлаў А. І., быў накіраваны запыт у кампанію “МТС” і атрыманы адказ, што сапраўды на адной з вышак слабы сігнал, і павышэнне яго магутнасці ў 2016 годзе не плануецца.
У гэтым сезоне мы пакуль што не адчувалі ніякіх праблем, выкліканых маразамі, але рана ці позна тэмпература хоць на некаторы час значна панізіцца, і тады пачнуцца цяжкасці з водазабеспячэннем вёсак. На гэтую праблему папрасілі загадзя звярнуць увагу жыхары Маціёва (уцяпліць калонкі, разабрацца з магчымым замярзаннем водаправоду ў адным месцы). Акрамя таго, у двух месцах у гэтай вёсцы пастаянна цячэ вада з-пад зямлі, з парванага водаправоду — на вуліцы Кветкавай (на здымку) і на тэрыторыі былога жывёлагадоўчага комплексу. Каб разабрацца з усімі гэтымі непаладкамі, прадпрыемству “Талачын-камунальнік”, відавочна, трэба будзе прыкласці немалыя намаганні.
А пажылыя жыхары папрасілі ўдасканаліць ганак мясцовай крамы (належыць райспажыўтаварыству) — устанавіць на ім якія-небудзь поручні, бо падымацца на даволі высокія прыступкі, ні за што не трымаючыся, слабым людзям цяжка і небяспечна.
Таксама па выніках сустрэч з жыхарамі на пасяджэнні былі разгледжаны пытанні абслугоўвання насельніцтва мабільнаю службаю паштовай сувязі, медыцынскага абслугоўвання, работы аўталаўкі, стану дарог, неналежнага ўтрымання сабак, зносу аварыйных дрэў, арганізацыі пасажыраперавозак і некаторыя іншыя. Як відаць, пытанні ў жыхароў сельскай мясцовасці ўзніклі літаральна да ўсіх раённых службаў, і сумеснае іх абмеркаванне, узгадненне плану дзеянняў паміж рознымі ведамствамі ў онлайн-рэжыме павінна паспрыяць як мага больш хуткаму і эфектыўнаму прыняццю неабходных мер.
Сяргей АБРАМОВІЧ.