Паляванне на нашы душы і кашалькі

Перыядычна даводзіцца чуць ад жыхароў Талачына пра тэлефанаванні невядомых людзей, якія прапаноўваюць пагутарыць пра Бога. Калі адразу не кінуць трубку, а пайсці на дыялог, то, у залежнасці ад таго, наколькі субяседніку ўдасца зацікавіць вас і пераканаць у сваіх ідэях, ён прапануе вам пагутарыць па тэлефоне калі-небудзь яшчэ, у іншы дзень, а то і адразу пасля першай гутаркі сустрэцца асабіста.

Зразумела, канчатковаю мэтаю гэтага дзеяча з’яўляецца зрабіць вас членам сваёй абшчыны і збіраць з вас рэгулярныя ўзносы ды іншыя разнастайныя ахвяраванні ў фінансавай форме ці ў выглядзе той ці іншай маёмасці.

У кастрычніку гэтага года ўпаўнаважаны па справах рэлігій і нацыянальнасцей аблвыканкама Даніленка М. Р. на сустрэчы з прадстаўнікамі рэгіянальных СМІ расказаў, як сам ён рэагуе на падобныя спробы зацягнуць яго ў секту:

— Звоняць у дамафон. Пытаюся: “Хто гэта?” Адказваюць: “Добры дзень, мы хочам пагутарыць пра Бога”. “А колькі вас?” “Двое”. “Вось і пагутарце”.

Некаторыя ж людзі спрабуюць, кажучы новамодным словам, троліць такіх субяседнікаў — здзекаваюцца, спачатку прыкінуўшыся, што зацікавіліся, развесілі вушы і гатовыя ўжо даць задурыць сабе галаву, але ў рэшце рэшт  ставяць субяседніка ў тупік якім-небудзь пытаннем ці насмешліваю заўвагаю і такім чынам паказваюць, што яго проста самога абдурылі, патрацілі яго час. На падобныя забавы, канечне, здольны толькі вельмі знаходлівы, дасціпны і разняволены чалавек, які за словам у кішэню не лезе, хаця паспрабаваць можа кожны, у інтэрнэце можна знайсці некаторыя метадычныя рэкамендацыі, напрыклад, па запыце “как потроллить свидетелей Иеговы?”.

А сёлетняй восенню па нашым горадзе гастралявалі ўмельцы, якія выцягваюць з людзей грошы не з дапамогаю рэлігійных ідэй, а больш празаічным метадам — навязваючы паслугі па тэхнічным абслугоўванні вокнаў. “Оконные мошенники добрались до Гродно”, “Оконные мошенники и как с ними бороться” — гэта толькі некаторыя з загалоўкаў публікацый, якія можна знайсці ў інтэрнэце па запытах “проверка окон”, “оконные мошенники” і інш.

Дзейнічаюць яны па наступнай схеме. Тэлефануюць на хатні тэлефон і афіцыйна-дзелавым, казённым тонам ставяць перад фактам: “Заўтра ў вашым доме будзе праводзіцца прафілактычная праверка вокнаў. У колькі гадзін вы зможаце быць дома?” Калі прызначыць ім сустрэчу, то прыйдуць, адчыняць-зачыняць вокны, пераканаюцца, што ўсё функцыянуе нармальна, магчыма, капнуць у механізм змазкі, і прапануюць падпісаць дагавор на абслугоўванне. Зразумела, на платнай аснове.

У юрыдычным сэнсе “аконныя махляры” нічога не парушаюць, таму, дарэчы, махлярамі (мошенниками) іх называюць умоўна, але з маральнага пункту гледжання гэта сапраўды лахатроншчыкі, якія нажываюцца на даверлівасці грамадзян, навязваючы неабавязковыя паслугі.

Некаторыя паводзяць сябе вельмі навязліва і агрэсіўна, заяўляюць, што вы абавязаны прадаставіць свае вокны для агляду з мэтаю прадухілення ўцечак цяпла падчас ацяпляльнага сезона, пагражаюць, што ў выпадку адмовы да вас могуць быць прыменены пэўныя санкцыі. Але на самай справе, зразумела, гэтая шантрапа не мае ніякіх паўнамоцтваў што-небудзь ад вас патрабаваць, і таму можна смела пасылаць іх куды-небудзь як мага далей.

Дарэчы, кампанія маладых людзей, якія адпрацоўвалі шматкватэрныя дамы ў Талачыне, ужо адным толькі знешнім выглядам павінна была насцярожыць грамадзян: напарфумленыя хлопчыкі ў пінжаках і белых кашулях, з бэйджыкамі ды папачкамі і партфелікамі — ні даць ні ўзяць менеджары, а не брыгада майстроў.

На жаль, метадаў тролінгу ў адносінах да гэтай катэгорыі аматараў лёгкай нажывы пакуль што знайсці не ўдалося. Можна хіба што прапанаваць таксама змарнаваць іх час — дамовіцца аб сустрэчы, а пасля ў апошні момант папрасіць прабачэння і перанесці сустрэчу на іншы дзень, пасля зноў, потым папрасіць пачакаць каля пад’езда, пакуль вы нібыта вернецеся з крамы, і г. д. — няхай панервуюцца.

Сяргей АБРАМОВІЧ.

Все новости

Другие статьи рубрики

Метки: Сергей Абрамович