Добрае сяброўства з кнігай: у гарадской дзіцячай бібліятэцы ў Талачыне адзначылі самых актыўных чытачоў
У гарадской дзіцячай бібліятэцы адбылося мерапрыемства, прысвечанае падвядзенню вынікаў штогадовай праграмы летняга чытання “Кніжная паляна-2018″. У акцыі прымалі ўдзел вучні 4 “А” класа сярэдняй школы №1 г. Талачына. Іх класны кіраўнік Алена Анатольеўна Касач у канцы навучальнага года прапанавала школьнікам спіс мастацкай літаратуры, якую яны павінны былі прачытаць на летніх канікулах.
У пачатку мерапрыемства загадчыца гарадской дзіцячай бібліятэкі Алена Валер’еўна Манькоўская правяла віктарыну па гэтых кнігах. Некаторыя школьнікі беспамылкова называлі імёны герояў літаратурных твораў па іх прыкметах і ўчынках. Затым адбылося ўзнагароджанне падарункамі і граматамі самых актыўных чытачоў.
Трэцяе месца заняла Віка Карпіновіч, другое падзялілі Пеця Бычко і Крысціна Віхрова. Першае месца заняла Настасся Лісоўская. Дзяўчынка з адказнасцю аднеслася да летняга задання, прачытала ўсе кнігі са школьнага спіса.
У канцы мерапрыемства Алена Валер’еўна напомніла, што кніга — лепшы сябар, запрасіла часцей наведваць бібліятэку. Яна заўважыла, што апошнім часам назіраецца павелічэнне колькасці чытачоў іх бібліятэкі сярод дзяцей. Найбольш актыўнымі чытачамі з’яўляюцца вучні малодшых класаў.
Алена СЕРАДА.
НА ЗДЫМКУ: злева направа Пеця Бычко, А. В. Манькоўская, Настасся Лісоўская, Крысціна Віхрова.
