Талачынцы ўшанавалі земляка, пра лёс якога раней нічога не ведалі
Амаль праз 8 дзясяткаў гадоў талачынская зямля прыняла свайго слаўнага сына, які аддаў жыццё ў барацьбе з нямецка-фашысцкімі захопнікамі на тэрыторыі Украіны. У суботу, 7 снежня, у парку «Юзэфполле» адбылося перапахаванне ў брацкую магілу астанкаў 22-гадовага салдата Васіля Аляксандравіча Белановіча, ураджэнца вёскі Поўсціхава.
Юнак загінуў у 1942 годзе ў Барвянкоўскім раёне Харкаўскай вобласці і знайшоў, як цяпер аказалася, не апошні, а перадапоші спачын на месцы тых трагічных падзей, упісаных у гісторыю пад назваю «Барвянкоўскі кацёл» (розныя крыніцы паведамляюць, што з савецкага боку ў «катле» загінулі і трапілі ў палон 270000 чалавек).
Астанкі Васіля Белановіча знойдзены сёлета ў верасні падчас усеўкраінскай пошукавай ваенна-патрыятычнай экспедыцыі «Барвянкоўскі кацёл-1942» (ідэнтыфікаваць іх удалося дзякуючы медальёну). Аддаць даніну павагі слаўнаму земляку прыйшлі жыхары горада, прадстаўнікі працоўных калектываў, навучальных устаноў, грамадскіх арганізацый, а таксама нашчадкі роду чырвонаармейца, якія і сёння жывуць на Талачыншчыне. Ад органаў улады прысутнічалі старшыня раённага выканаўчага камітэта Сяргей Валер’евіч Ягораў, старшыня раённага Савета дэпутатаў Георгій Георгіевіч Мурашка і іншыя службовыя асобы з ліку раённай адміністрацыі, начальнік галоўнага ўпраўлення ідэалагічнай работы і па справах моладзі аблвыканкама Генадзій Міхайлавіч Ягораў. Астанкі салдата і яго асабістыя рэчы (лыжка, гузікі, рэшткі папругі) даставіла ў Талачын усеўкраінская грамадская арганізацыя «Саюз “Народная памяць”».
— Выказваем шчырую падзяку пошукаваму атраду арганізацыі «Саюз “Народная памяць”» і асабіста яе старшыні Жылкіну Яраславу Аляксандравічу за вялікую работу па ўвекавечанні памяці абаронцаў Радзімы, сярод якіх нямала і нашых землякоў, — звярнуўся да ўкраінскіх гасцей у ходзе мітынгу кіраўнік раёна. — Вы свята захоўваеце памяць і не словам, а справаю вяртаеце салдатаў з небыцця.
— Мы схіляем галовы перад памяццю тых, хто адстаяў свабоду і незалежнасць нашай краіны, — адзначыў у сваім выступленні Ягораў Г. М. — Вечная слава і памяць усім, хто паклаў свае жыцці на алтар Вялікай Перамогі.
Старшыня арганізацыі «Саюз “Народная памяць”» паведаміў некаторыя дэталі, звязаныя з ідэнтыфікацыяй асобы Васіля Белановіча:
— Знойдзены быў у няўлічаным воінскім пахаванні. Побач з ім знаходзілася 11 яго таварышаў. На сённяшні дзень вызначаны пакуль што толькі ён, Белановіч Васіль Аляксандравіч.
У апошні шлях Васіль Белановіч быў праведзены з выкананнем усіх воінскіх, свецкіх і рэлігійных абрадаў: хвіліна маўчання, духавы аркестр, малітва, салют, ускладанне гірлянды (з яловых галін), вянкоў і кветак. Мы мала што ведаем пра Васіля Белановіча, але адчувалі яго прысутнасць і сваё адзінства з ім, сваім земляком, які аддаў жыццё за нашу будучыню і, дзякуючы старанням нашых украінскіх сяброў, пасля доўгага расстання нарэшце вярнуўся да нас.
Сяргей Абрамовіч.
Талачынцы ўшанавалі земляка, пра лёс якога раней нічога не ведалі,