Коханава прывітала Масленіцу кірмашом, песнямі і танцамі (+фота)
Масленічны тыдзень стартаваў учора, але яшчэ напярэдадні яго, у мінулую суботу, у Коханаве прайшло маштабнае святочнае мерапрыемства, прысвечанае сустрэчы Зімы з Вясною.
Уздоўж цэнтральнай плошчы мікрараёна разгарнуўся кірмаш. Тут можна было набыць што-небудзь для гаспадаркі, выбраць падарунак для каго-небудзь, а таксама пачаставацца.
Самаварам з нізкаю баранкаў, блінамі і мноствам самых разнастайных кандытарскіх вырабаў прываблівала прахожых гандлёвая кропка УП «Талачынскі Элеватар-Агра». Рамеснікі з Віцебска прапанавалі ўсялякія гаспадарчыя рэчы і элементы адзення ручной работы: драўляны посуд, плеценыя кашы і куфэркі, сувеніры, вязаныя шкарпэткі, пальчаткі, шалікі і інш.
Артысты мясцовага Дома культуры на працягу дзвюх гадзін забаўлялі коханаўцаў песнямі, а таксама далі ўсім дарослым і дзецям магчымасць паўдзельнічаць у рытуале на прыцягненне ўдачы — прайсці пад музыку ў своеасаблівым карагодзе, трымаючыся, нібыта за прамень Сонца, за адну са стужак, прымацаваных да ўзнятага на шэст кола. Традыцыйны для масленічных сцэнарыяў матыў барацьбы паміж Зімой і Вясной гэтым разам адсутнічаў: ніхто з персанажаў не скардзіўся на халады, а поры года, змяняючы адна другую, сустрэліся і развіталіся ветліва.
Улічваючы незвычайна мяккі характар сёлетняй кліматычнай зімы, можна пажадаць, каб коханаўскае свята стала сімвалічным і хутчэй насталі ясныя, цёплыя дні.
Сяргей АБРАМОВІЧ.
