Талачын святкуе Дзень Перамогі
Памнажаючы стараннай працаю свой дабрабыт і радуючыся жыццю пад мірным небам, мы абавязаны памятаць пра подзвіг савецкіх людзей у гады Вялікай Айчыннай вайны, захоўваць і перадаваць памяць пра гэты подзвіг наступным пакаленням — з такім напамінам звярнуўся сёння старшыня раённага выканаўчага камітэта Алег Лындзін да ўдзельнікаў мітынгу каля помніка «Вызваленне».
— 9 Мая — гэта дзень нашай агульнай памяці, памяці пра тых, хто ішоў насустрач смерці дзеля жыцця і свабоды сваёй Радзімы, пра тых, хто набліжаў Вялікую Перамогу гераічнай працаю ў тыле, — паведаміў Алег Міхайлавіч, гаворачы пра значэнне Дня Перамогі ў духоўным жыцці народа. — Пра гэты дзень, пра Перамогу, у суровыя ваенныя гады марылі мільёны нашых людзей, мільёны нашых грамадзян жылі надзеяй і з гэтай надзеяй паміралі.
— Гісторыя чалавецтва — гэта гісторыя вялікіх ці малых войнаў, але Вялікая Айчынная вайна вызначылася найвялікшай разбуральнасцю і самымі вялікімі ахвярамі, — адзначыў у ходзе мітынгу заслужаны работнік сельскай гаспадаркі Рэспублікі Беларусь, ганаровы грамадзянін Талачына, дырэктар Талачынскага кансервавага завода Анатоль Анюхоўскі. — Гэта была вайна не толькі гітлераўскай Германіі, гэта была вайна аб’яднанай Еўропы, як мы сёння яе называем, супраць нашай маладой сацыялістычнай дзяржавы. Супраць нас ваявалі арміі і дывізіі многіх еўрапейскіх краін: румынскія, італьянскія, іспанскія, дацкія, французскія, галандскія, чэшскія, польскія… Гэта была вайна на знішчэнне савецкага народа, у склад якога ўваходзілі і беларусы. Планам «Ост» прадугледжвалася знішчэнне 75 % насельніцтва і ператварэнне 25 % у рабоў. Таму перад нашым народам стаяў выбар: перамагчы ці памерці. І мы перамаглі!
На мітынгу, які адбыўся сёння ў парку «Юзэфполле», выступілі старшыня раённага Савета дэпутатаў Георгій Мурашка і благачынны цэркваў Талачынскага раёна Аляксандр Лазука.
Іншыя падрабязнасці — у бліжэйшым нумары газеты. Глядзіце таксама фрагменты сённяшніх урачыстасцей і пазаўчарашняга аўтапрабегу ў відэароліку.
Сяргей АБРАМОВІЧ.
Талачын святкуе Дзень Перамогі,