Маладыя спецыялісты Талачынскай ЦРБ сустрэнуць Дзень сям’і ў новых кватэрах
Сёння каля першага пад’езда нядаўна пабудаванага ў Талачыне дома № 4 па вуліцы Будаўнікоў адбылася цырымонія ўручэння ключоў сем’ям маладых спецыялістаў Талачынскай цэнтральнай раённай бальніцы.
Арэндныя кватэры атрымалі ўрач-анестэзіёлаг Юрый Уладзіміравіч і ўрач агульнай практыкі Таццяна Андрэеўна Панчанка, урач-хірург Данііл Уладзіміравіч і выпускніца Віцебскага дзяржаўнага медыцынскага ўніверсітэта (цяпер праходзіць інтэрнатуру ў Віцебску) Дар’я Сяргееўна Антончык. Для кагосьці з іх Талачын з’яўляецца родным горадам (у прыватнасці, Юрый і Данііл працягваюць медыцынскія дынастыі Талачынскай ЦРБ), а для кагосьці, магчыма, яшчэ не паспеў ім стаць, але цяпер для гэтага ёсць усе перадумовы, галоўныя з якіх — прэстыжная праца і добрае жыллё.
Урачыстасць была прымеркавана да Міжнароднага дня сям’і, які маладыя людзі сустрэнуць 15 мая ўжо ў сваім, асобным сямейным кутку, з’яўляючыся яго паўнапраўнымі і адзінымі гаспадарамі. Ключы навасёлам уручыла з віншаваннямі і добрымі пажаданнямі намеснік старшыні райвыканкама, дэпутат абласнога Савета дэпутатаў Іна Сцяпанаўна Галубкова. Да віншаванняў далучыліся калегі маладых медработнікаў разам з галоўным урачом раённай бальніцы Аляксеем Дзмітрыевічам Вішнеўскім, начальнік аддзела ідэалагічнай работы, культуры і па справах моладзі райвыканкама Алена Васільеўна Валевіч.
— Падтрымка сям’і, падтрымка маладых спецыялістаў — важныя напрамкі дзяржаўнай сацыяльнай палітыкі, — паведаміла Іна Сцяпанаўна, звяртаючыся да прысутных. — На ўсіх узроўнях у рэспубліцы праводзіцца вялікая работа, накіраваная на задавальненне патрэб моладзі, сведчаннем чаму з’яўляецца і наша сённяшняя сустрэча з такой прыемнай нагоды.
Іна Сцяпанаўна пажадала навасёлам застацца ў раёне і плённай працай услаўляць сваю малую радзіму і Рэспубліку Беларусь, а таксама выказала спадзяванне, што яны не адзіныя, каму пашчасціла вырашыць сваё жыллёвае пытанне, і ў нас будуць і надалей замацоўвацца новыя маладыя спецыялісты.
Сяргей АБРАМОВІЧ.
