У Талачынскім раёне ажыццяўляецца штодзённы маніторынг цэн

Аддзел эканомікі Талачынскага райвыканкама ажыццяўляе штодзённы маніторынг выканання суб’ектамі гаспадарання Дырэктывы Прэзідэнта Рэспублікі Беларусь №10 ад 06.10.2022 г. «Аб недапушчальнасці росту цэн» і пастановы Савета Міністраў №669 ад 06.10.2022 г. «Аб часовых мерах па стабілізацыі цэн».

— Усе суб’екты, якія ажыццяўляюць на тэрыторыі раёна дзейнасць у сферы гандлю, паслуг і грамадскага харчавання, азнаёмлены з вышэйназванымі дырэктывай і пастановай і, як паказвае практыка, ставяцца да прадугледжаных імі мер з разуменнем, — паведаміла галоўны спецыяліст аддзела эканомікі Марына Анікіевіч. — Цэны на тавары і паслугі павінны быць зафіксаваны па стане на 5 кастрычніка бягучага года. Кожны дзень мы выбарачна выязджаем у розныя населеныя пункты з мэтай кантролю за выкананнем гэтага патрабавання. Па выніках аб’езду штодзённа робім справаздачу ў аблвыканкам, Камітэт дзяржкантролю Віцебскай вобласці і пракуратуру раёна.

Напрыклад, у панядзелак ажыццёўлены аб’езд харчовых і прамысловых крамаў прыватнай формы ўласнасці ў гарадскім пасёлку Коханава. Фактаў павышэння цэн не выяўлена.

Сяргей АБРАМОВІЧ.