Раённай бібліятэкай створана база даных «Героі Сацыялістычнай Працы — нашы землякі»

Год міру і стварэння крочыць па краіне. Стваральная праца – галоўная ўмова развіцця дзяржавы. Менавіта праца павінна стаць падмуркам кансалідацыі беларускага грамадства.

Талачыншчына — край працавітых людзей. Мы з поўным правам ганарымся працаўнікамі, якія ўнеслі значны ўклад у развіццё сельскай гаспадаркі і прамысловасці раёна і краіны. Перш за ўсё гэта Героі Сацыялістычнай Працы, якія праславілі раён.

З мэтай захавання памяці аб знакамітых людзях краю раённай бібліятэкай створана база даных  «Героі Сацыялістычнай Працы — нашы землякі». База змяшчае інфармацыю аб 12 персаналіях, даты і месцы нараджэння працаўнікоў, звесткі аб іх узнагародах і працоўных дасягненнях. Рэсурс дапоўнены крыніцамі інфармацыі аб персаналіях з друкаваных і электронных носьбітаў.

Дарэчы, гэта не першая база даных, створаная бібліятэкарамі. На сайце ўстановы ДУК «Талачынская цэнтралізаваная бібліятэчная сістэма» у раздзеле «Краязнаўства» змешчаны базы даных «Мае землякi — удзельнiкi Вялiкай Айчыннай вайны» і «Талачыншчына літаратурная».

Спадзяёмся на актыўнае выкарыстанне дадзеных рэсурсаў.

Ірына Труханёнак,
бібліятэкар аддзела бібліятэчнага маркетынгу.