У талачынскім тэатры — прэм’ера: камедыя «Таблетка ад старасці» (+фота)
Сёння ў народным тэатры раённага Цэнтра культуры з поспехам прайшла прэм’ера — камедыя паводле п’есы беларускага драматурга Васіля Ткачова (1948 — 2022) «Таблетка ад старасці».
Ні пра якія фармацэўтычныя сродкі ў п’есе гаворка не вядзецца: таблеткаю ад старасці адзін герой паважнага ўзросту называе дзяўчыну, якая пазіруе ў аголеным выглядзе ў Акадэміі мастацтваў і не абцяжарвае сябе строгімі маральнымі нормамі ва ўзаемаадносінах з супрацьлеглым полам (напрыклад, не адмаўляецца ад заляцанняў замежнага турыста, а калі яе жаніх дэманструе рэўнасць з гэтай прычыны, адказвае яму, што ён паводзіць сябе як несучасны чалавек).
Галоўнай тэмаю п’есы можна назваць узаемаадносіны мужчын і жанчын, сямейныя каштоўнасці. Закранаецца таксама дэмаграфічная праблема сучаснай вёскі, гучаць матывы супрацьпастаўлення гарадскога і вясковага ладу жыцця, рознасці менталітэту вяскоўцаў і гараджан.
Спектакль пастаўлены пад кіраўніцтвам нязменнага рэжысёра тэатра Святланы Васільевай. Ролі выконваюць Алеся Галыга, Руслан Забалотнік, Наталля Мікульчык, Уладзімір Драздоў, Аляксандр Ражанскі, Уладзімір Чаплянок, Дзяніс Валіцкі, Аксана Самсонава, Клаўдзія Кастрыца.
Сяргей АБРАМОВІЧ.
Фота Алесі КУЗЬМІЧ.
