БАГАТЫЯ ТРАФЕІ БЯСКРЫЎДНАГА ПАЛЯВАННЯ
Малады спецыяліст, выпускнік тэхналагічнага ўніверсітэта па спецыяльнасці інжынер лясной гаспадаркі Аляксандр Вышадкевіч узначаліў нядаўна Аболецкае лясніцтва. На Талачыншчыну ён прыехаў па размеркаванні разам з жонкай Надзеяй, якая таксама працуе з ім, на пасадзе памочніка ляснічага. Родам Аляксандр з Глыбоцкага раёна, Надзея з горада Жыткавічы Гомельскай вобласці, пазнаёміліся падчас вучобы ва ўніверсітэце. Зараз жывуць у Абольцах, пакуль што на кватэры, іх будучае службовае жыллё знаходзіцца ў стадыі будаўніцтва.
Аляксандр заўсёды цікавіўся паляваннем і нават хацеў набыць стрэльбу, толькі не мог зрабіць гэтага, таму што жыў у Мінску, вучыўся, не меў пастаяннай прапіскі. Але лес, прырода неадольна прыцягвалі яго, і малады чалавек захапіўся фотапаляваннем. На сённяшні дзень у архіве Аляксандра ёсць ужо нямала “трафеяў”, здабытых у тым ліку і ў нашых лясах, на тэрыторыі яго лясніцтва, на палях у ваколіцах Абольцаў: птушкі, лісы, зайцы. Дапаўняюць калекцыю і пейзажы.
Фотапаляўнічаму ўдаецца падлавіць такія прыгожыя сюжэты, што некаторыя з іх маглі б заняць месца на паштоўках ці фоташпалерах.
С. АБРАМОВІЧ.
*************************************************************************
БАГАТЫЯ ТРАФЕІ БЯСКРЫЎДНАГА ПАЛЯВАННЯ,