УЗРОВЕНЬ ТУРНІРАЎ РОЗНЫ, ВЫНІК АДНОЛЬКАВЫ – СТАНОЎЧЫ
18-19 сакавіка ў польскім Рацібушы прайшоў міжнародны турнір па грэка-рымскай барацьбе сярод маладзёжных каманд. У складзе зборнай Рэспубліку Беларусь прадстаўляў на ім і наш зямляк Сяргей Лапін. У вагавой катэгорыі да 96 кілаграмаў Сяргею не знайшлося роўных і ён, атрымаўшы перамогі ва ўсіх сваіх паядынках, узняўся на верхнюю прыступку п’едэстала гонару. Трэба зазначыць, што выезд нашага земляка на спаборніцтвы ў Польшчу, якія сталі адным з этапаў адбору да маладзёжнага першынства Еўропы, стаў магчымым дзякуючы спонсарам — на просьбу аб дапамозе зноў адгукнуліся індывідуальныя прадпрымальнікі Уладзімір Камлюк і Аляксандр Кавалеўскі.
У гэтыя ж тэрміны ў Віцебску ў адкрытым рэспубліканскім турніры памяці А.К. Гараўца за перамогу спрачаліся юнакі 1996-1997 гадоў нараджэння. І тут нашы грэка-рымляне не засталіся без узнагарод — трэцяе месца ў вагавой катэгорыі да 38 кілаграмаў на рахунку Мікіты Казлоўскага.
Найбольш жа ўраджайным на прызавыя месцы для нашых спартсменаў выдалася адкрытае першынство г. Магілёва сярод юнакоў 1998-1999 гадоў нараджэння. Шэсць з васьмі талачынскіх барцоў вярнуліся дадому з медалямі — Арцём Муртазаеў і Мікіта Казлоўскі сталі пераможцамі, Павел Калістратаў і Мікалай Камлюк былі другімі, Мікіта Бычкоў і Аляксей Богуш узняліся на трэцюю прыступку п’едэстала гонару.
І. СНАРАЎ.