ЖЫВУЦЬ, РАСТУЦЬ У НОВЫМ ДОМЕ
Маладыя бацькі пецярых дзяцей марылі аб сваім прасторным доме даўно. Жыла сям’я Сачыўкаў у двухпакаёвай кватэры ў пасёлку Нарцызава. Калі адзін за адным пачалі нараджацца дзеці, месца для ўсіх аказалася мала. Дзецям не тое што пагуляць і пабегаць, павярнуцца не было дзе. Звярнуліся ў выканкам. Спецыяльна створаная камісія разгледзела іх умовы жыцця і прыняла рашэнне пачаць будаўніцтва новага дома для шматдзетнай сям’і. Афармленне неабходных дакументаў заняло даволі працяглы час. Нарэшце было выбрана месца ў канцы вёскі Ламіншчына, закладзены фундамент. Праз год дом быў здадзены.
Гаспадары не маглі нарадавацца прасторным і светлым пакоям. У параўнанні з ранейшым жыллём дзеці змаглі свабадней рухацца, адпачываць у больш зручных умовах. Пакоі адразу падзялілі паміж хлопчыкамі і дзяўчынкамі. Маладыя гаспадары пачалі абсталёўвацца на свой густ. Тым больш, што мэбля была куплена даўно і “чакала” хутчэй заняць сваё месца.
У новым доме праведзены прыродны газ і ацяпленне, абсталяваны санвузел. Гаспадыня з задавальненнем паказала нам чыста прыбраныя дзіцячыя пакоі, кухню. У зале вырашылі на падлогу пакласці спецыяльнае пакрыццё. Некаторыя маладыя бацькі наракаюць на цяжкасці ў выхаванні адзінага дзіцяці. А вось Алена і Валерый Сачыўкі прывучаюць сваіх дзетак да парадку і дысцыпліны з маленства. Раніцай большыя пад кантролем маці самастойна збіраюцца ў школу, а малодшая Палінка наведвае дзіцячы сад. Дамашнія справы гаспадыні на працягу дня не даюць сядзець склаўшы рукі.
Утульнасць унутры дома стварае кантраст з вонкавым выглядам, неабжытасцю тэрыторыі двара. Добра ведаючы гаспадарчую струнку сямейнай пары Сачыўкаў, гэта здзівіла і ўразіла. Алена расказала, што яны сваімі сіламі ўсю вясну выкарчоўвалі дрэвы старога сада, які знаходзіўся амаль побач з домам. Работнікі былой арганізацыі “Рамонтнік”, якія будавалі дом, пакінулі пасля сябе шматлікія недаробкі. Ужо развальваюцца ступенькі ганка, дзе-нідзе псуецца афарбоўка. Алена паведаміла, што абяцалі прывезці пяску, каб зрабіць падсыпку, аднак усё засталося па-ранейшаму. Валерый стараецца сваімі рукамі добраўпарадкаваць тэрыторыю, а вясною гаспадыня марыць упрыгожыць дом прыгожымі кветкамі, пасадзіць агародніну. Клопату хутка прыбавіцца: яны чакаюць прыбаўлення ў сваёй вялікай маладой сям’і.
А. СЕРАДА.
