ЯБЛЫЧНЫЯ ЎРАДЖАІ ТОЛЬКІ ПАЧЫНАЮЦЦА
Калі адчыняюцца герметычныя дзверы камеры захоўвання яблыкаў, адтуль выплывае цудоўны мяккі, салодкі водар. Тоны карыснай вітаміннай прадукцыі, сабраныя ў адным месцы, ствараюць асаблівую, непаўторную атмасферу.
Праўда, пакуль што сад кансервавага завода дае далёка не ўсё, што можа даць. Першыя пасадкі 2005-2006 гадоў па разліках сёлета павінны былі б парадаваць вялікім ураджаем. Але разлікі не апраўдаліся, і замест радасці прыйшло засмучэнне тым фактам, што прывазныя саджанцы аказаліся няякаснымі. Затое даюць добрую надзею пазнейшыя пасадкі — дрэвы, вырашчаныя ў сваім гадавальніку. Сёлета іх ураджайнасць складала каля 6 тон з гектара — канечне, не вельмі многа, але гэта толькі пачатак.
А на першых, няўдалых пасадках сёлетняй восенню быў праведзены вялікі аб’ём рамонтных работ: за 20 дзён на плошчы 19 гектараў уручную пасаджана 19000 саджанцаў.
Несумненна, у недалёкай будучыні бульбяны поспех завода павінен дапоўніцца яблычным.
У. МІХАЙЛАЎ.
