ЦІ АСУШЫЦЦА НАРЭШЦЕ МАЦІЁВА?
Колькі ўжо гадоў пакутуюць жыхары Маціёва ад навадненняў! Гадоў пяць ці шэсць, дакладна ніхто не памятае. І самае страшнае і крыўднае ў тым, што бедства гэтае не стыхійнае, а выкліканае людзьмі — і беднасцю іх, і разгільдзяйствам. Залівае вадой дамы і агароды ў канцы вуліцы Кудзіна, размывае дарогу (а зімой яна яшчэ і абмярзае, пакрываецца льдом) па прычыне парыву водаправода, які забяспечвае вадой вёску і жывёлагадоўчы комплекс былога УП “Талачынская Навінка”. Менавіта на балансе гэтай гаспадаркі знаходзіўся водаправод, а сёлета перайшоў у спадчыну “Славеням-Агра” ў выніку аб’яднання двух прадпрыемстваў.
У пачатку снежня дзве жыхаркі Маціёва, якія найбольш пакутуюць ад патопаў, вымушаныя былі звярнуцца да члена Савета Рэспублікі Анюхоўскага А.В. Пытанне разглядалася з удзелам дырэктара ААТ “Славені-Агра” Харкевіча А.А., старшыні Талачынскага сельсавета Іванова С.А., а таксама дырэктара УВП ЖКГ “Талачын-камунальнік” Хадневіча І.Г. (ЖКГ да гэтай праблемы ў прынцыпе не мае адносін, але можа дапамагчы ў вырашэнні тэхнічных пытанняў і правядзенні работ). Абмяркоўваліся такія варыянты выхаду з сітуацыі, як рамонт ці поўная замена аварыйнага ўчастка водаправода. Было вырашана назаўтра яшчэ раз наведаць месца парываў і ўжо там канкрэтызаваць план дзеянняў.
Па стане на сярэдзіну месяца праблема пакуль што заставалася. Так, 14 снежня вырашалася пытанне аб тым, каб пракапаць канаву, зліць штучна ўтворанае возера і ліквідаваць парывы, але работы ў той дзень не вяліся па прычыне паломкі экскаватара прадпрыемства ЖКГ. Як гэта сімвалічна: немагчыма адрамантаваць водаправод, таму што патрабуе рамонту экскаватар… Усё ў нас зношанае і сапсаванае, няма каму, няма калі і няма за што правесці элементарныя работы, навесці хоць мінімальны парадак там, дзе пакуль што пануе поўнае бязладдзе.
Хочацца спадзявацца, што работы ў хуткім часе ўсё ж будуць праведзеныя і парывы ў бліжэйшы час не паўторацца.
С. АБРАМОВІЧ.