НАВАГОДНЯЯ СУСТРЭЧА

На мінулым тыдні ў гарадскім Доме культуры для дзяцей-сірот, інвалідаў і дзяцей з апякунскіх сем’яў адбылася дабрачынная навагодняя ёлка. Ранішнік праходзіў у рамках рэспубліканскай акцыі “Нашы дзеці”, у якую актыўна ўключыліся шматлікія арганізацыі, установы і прадпрыемствы раёна, а таксама індывідуальныя прадпрымальнікі і прыватныя асобы.

Святочная праграма была падрыхтавана спецыялістамі Цэнтра дзяцей і моладзі. З Новым годам гасцей свята віншавалі казачныя героі, Дзед Мароз і Снягурка. Разам з імі рабяты запальвалі навагоднюю ёлку, разгадвалі загадкі, вадзілі карагоды, прымалі ўдзел у гульнях і конкурсах.

Натуральна, не абышлося і без падарункаў. За кошт сродкаў, пералічаных на рахунак раённай грамадскай арганізацыі “Беларускі дзіцячы фонд” удзельнікамі акцыі, для дзяцей былі набыты разнастайныя гасцінцы. Акрамя таго, свае падарункі ім прывезлі супрацоўнікі Талачынскага раённага аддзела па надзвычайных сітуацыях.

Задаволенымі засталіся і дзеці, і дарослыя.

С. МАРЦЫНКЕВІЧ.