ШЧЫРУЕ І Ў ПОЛІ, І ДОМА
Трэці год у ААТ “Жукнева” працуе малады механізатар Андрэй Ігнаткевіч.
Сёлета ён стаў пераможцам раённага спаборніцтва сярод маладых механізатараў, занятых на вясенняй сяўбе. На трактары “Беларус-3022″ Андрэй засеяў амаль паўтысячы гектараў яравых зерневых культур. За руплівую і старанную працу хлопец атрымаў ганаровую грамату ад раённага камітэта грамадскага аб’яднання “БРСМ” і памятны падарунак ад аддзела па справах моладзі райвыканкама.
У сельскую гаспадарку Андрэй прыйшоў не адразу. Змяніў не адно месца працы, пакуль не знайшоў сябе менавіта тут, на зямлі. На выбар вясковай прафесіі паўплывала, мабыць, тое, што сам родам з вёскі, маленства прайшло ў Мяшкове. Скончыўшы курсы пры райаграсэрвісе ў Талачыне, атрымаў правы на кіраванне тэхнікай.
Каб было весялей, хлопец устанавіў у кабіну свайго трактара сучасную CD-магнітолу, бо музыка, добры настрой не апошняе ў працы. Для поўнага задавальнення, бадай, не хапае толькі кандыцыянера. Зараз перадавы механізатар заняты на адвозцы кармоў. Пасля працы спяшаецца да дарагіх яму жонкі і сыноў. Старэйшаму, Івану, хутка споўніцца шэсць, у гэтым годзе ён пойдзе ў школу, малодшаму, Глебу, — годзік. Маладая сям’я жыве ў выдзеленым ім сельгаспрадпрыемствам новым доме. Руплівасць і дбайнасць Андрэя бачныя і тут. Асабліва кідаецца ў вочы прыгожы, пафарбаваны ў барвовы колер, плот. Ёсць свой агарод, гаспадарка, якімі займаецца ў вольны час. Прызнаецца, што не супраць бы пасядзець і ў “Аднакласніках”, ды на Інтэрнэт вольнага часу пры напружаным графіку працы земляроба, на жаль, не хапае.
С. МАРЦЫНКЕВІЧ.