ЧАРГОВЫ КРОК У БУДУЧЫНЮ
Участак для галасавання №31, які традыцыйна размяшчаецца ў будынку раённага Цэнтра дзяцей і моладзі, сёлета сустрэў выбаршчыкаў прывычнай, знаёмай абстаноўкай: на сваіх ранейшых месцах тры скразныя кабінкі (з аднаго боку ўваход, з другога выхад), урна, сталы выбарчай камісіі і назіральнікаў. Як і заўсёды раней, добразычлівая, лёгкая, урачыстая, святочная атмасфера сустракае грамадзян, якія прыходзяць аддаць голас за вызначанага для сябе кандыдата.
Але адбыліся ў рабоце ўчастка і некаторыя прыемныя змены. Старыя фанерныя скрынкі, што перажылі ўжо не адно галасаванне, замененыя на празрыстыя пластыкавыя. Пламбіруюцца яны металічнымі пломбамі, а не сургучом ці пластылінам, як у мінулыя гады. Набылі іншае, больш прывабнае аблічча і кабінкі, для стварэння якіх выкарыстаная новая тканіна — прыемнага, бліскучага барвовага і ружовага колераў.
Такое тэхналагічнае і эстэтычнае абнаўленне выглядае сімвалічна, нібыта прадвяшчае новыя здзяйсненні, дасягненні ў нашым жыцці. Галасаванне — гэта заўсёды выбар, ад якога залежыць нашая будучыня, гэта адказны крок да чагосьці новага, больш дасканалага, лепшага. Застаўся ззаду пройдзены этап, і ўсе мы глядзім у заўтрашні дзень. Глядзім і ўваходзім у яго, ставячы новыя мэты і рашаючы новыя задачы на шляху да іх.
С. АБРАМОВІЧ.