У СЕЛЬГАСПРАДПРЫЕМСТВАХ ПАЧАЎСЯ ТЭХАГЛЯД
У першы дзень каляндарнай вясны пачаўся агляд тэхнікі ў сельгаспрадпрыемствах раёна. Нават калі яшчэ ляжыць снег і па начах вяртаюцца сур’ёзныя маразы, гаспадаркі павінны быць падрыхтаванымі да пачатку палявых работ, нічога нельга адкладваць на заўтра і паслязаўтра.
Першым прадставіла свой мехдвор для кантрольнага агляду ААТ “Каралькі”. Адразу каля ўезду размясцілася земляробчая тэхніка, крыху далей, у глыбіні, выстраіўся рад трактароў. Праверка дакументаў у механізатараў, знешні агляд машын і кантроль іх тэхнічнага стану — працэс праходзіць стандартна, у адпаведнасці з усім вядомымі і прывычнымі нормамі і патрабаваннямі.
— Мы разумеем усе цяжкасці матэрыяльнага, фінансавага характару, недахоп сродкаў, запчастак і г.д., таму да розных дробязей не чапляемся, але калі весці гаворку пра бяспеку і эфектыўнасць працы, беражлівыя адносіны да тэхнікі, то тут, канечне, усё павінна строга адпавядаць нормам, — расказаў начальнік дзяржтэхагляду райсельгасхарча Талкачоў А.Л.
Калі гаварыць менавіта пра “Каралькі”, то, па словах Аляксея Леанідавіча, у цэлым узровень падрыхтаванасці даволі добры, заслугоўвае станоўчай ацэнкі.
Завяршыцца тэхагляд павінен у другой палове сакавіка.
С. АБРАМОВІЧ.