Добры пачатак — справе палавіна
Арганізавана пачалі нарыхтоўку кармоў у сельгаспрадпрыемстве “Надзёжына”. У першыя тры дні работы толькі з падкошвання пашы, уключаючы папераджальнае падкошванне, нарыхтавалі і паклалі ў траншэі тысячу тон правяленай масы. Запоўненая траншэя на ферме ў вёсцы Межыёва, заканчваецца закладка траншэйнай ёмістасці на чатыры тысячы тон на комплексе.
Каб у поўнай гатоўнасці вывесці корманарыхтоўчае звяно ў поле, спатрэбілася ў рамонт тэхнікі, набыццё вузлоў і запчастак укласці больш за 200 млн. рублёў сродкаў. Але, па меркаванні дырэктара прадпрыемства Міхаіла Кірыка, даны крок таго варты, што і пацвярджае ўзяты старт у важнейшай кампаніі года.
У складзе звяна 3 касілкі, 2 грабляў, 2 здрабняльнікі — “Ягуар” і “КВК-800″. На адвозцы задзейнічана 6 адзінак тэхнікі. У сярэднім штодзённа закладваецца ў гаспадарцы 600 — 800 тон сенажу.
Прыступілі тут і да нарыхтоўкі сена. Неабходна ўбраць 955 гектараў плошчаў.
Для аператыўнага рамонту тэхнікі прама ў полі набытыя перасоўны зварачны апарат, балгарка, дрыль і іншыя тэхнічныя сродкі.
Працаўнікі, занятыя на нарыхтоўцы кармоў, забяспечваюцца двухразовымі гарачымі абедамі. Робяць у гэтыя выключна адказныя дні, якія потым увесь год кормяць, з 6 гадзін раніцы і да позняга вечара. Махавік корманарыхтоўкі на Талачыншчыне з кожным новым днём набірае свае абароты.
В. МІКАЛАЕЎ.
