Вандроўка па родным краі
Урок грамадскасці з вучнямі 10 класа Талачынскай сярэдняй школы №1 праведзены работнікамі цэнтральнай раённай бібліятэкі.
З гісторыяй старажытнага Друцка пазнаёміла дырэктар гісторыка-краязнаўчага музея Ірына Пікулік. Бібліятэкары Таццяна Пабяржына і Алена Манькоўская расказалі пра слаўнае мінулае і сучаснае жыццё Талачына, якому ў гэтым годзе спаўняецца 580 гадоў. Што пачытаць пра мінулае талачынскага краю, парэкамендавала вучням бібліёграф Ірына Труханёнак, прэзентуючы кніжную выставу “Зямля, адкуль мы родам”.
Любоўю да роднай зямлі прасякнута кожнае слова вершаў мясцовых паэтаў Яўгена Дарафеева, Віктара Бірукова, Алеся Мазура, Тамары Кушалевіч і Міхаіла Татарановіча, з якімі выступілі вучні.
Не пакінуў нікога абыякавым і відэафільм “Спрадвечная талака” з цыклу “Зямля беларуская”. У ім адлюстраваны памяць аб продках і іх слаўных справах, сучасныя будні жыхароў Талачыншчыны.
Такія мерапрыемствы выхоўваюць у моладзі гонар за сваю “малую радзіму”, за баявы і працоўны гераізм продкаў, дапамагаюць усведамляць сваю ролю ў сучаснасці і будучыні роднага краю.
М. ХМЯЛЮК.