Малады спецыяліст: першыя крокі ў сельскай гаспадарцы не расчаравалі
Прафесію эканаміста Раман Бухавец лічыць прэстыжнай і перспектыўнай. У школе яму падабалася матэматыка. Пасля дзевяці класаў вырашыў падаць дакументы у Смальянскі дзяржаўны аграрны каледж на спецыяльнасць “эканаміст”. Жыў з бацькамі тут жа, у Смальянах. Вучоба Раману давалася лёгка, ён заўсёды паспяхова здаваў экзамены і залікі.
Месяц практыкі ў сельгаспрадпрыемстве “Камсамольская праўда” Талачынскага раёна запомніўся хлопцу. Ён упэўніўся, што абраная ім прафесія няпростая, але надзвычай цікавая. У многіх пытаннях Раману дапамаглі бухгалтары, эканамісты сельгаспрадпрыемства. Малады дружалюбны хлопец паспеў прыжыцца ў працоўным калектыве. Дырэктар ААТ “Камсамольская праўда” Андрэй Мікалаевіч Лісаў заўважыў стараннасць Рамана, яго неабыякавасць да справы. У сельгаспрадпрыемстве якраз узнікла няхватка галоўнага эканаміста. Пасля дзяржаўных экзаменаў пры размеркаванні кіраўнік гаспадаркі звярнуўся да адміністрацыі каледжа з просьбай накіраваць маладога спецыяліста на Талачыншчыну. Тым больш, што Раман быў не супраць пачаць працоўную дзейнасць у знаёмым ужо калектыве.
Прайшло паўгода з пачатку работы Рамана на пасадзе галоўнага эканаміста. Ён не расчараваўся, наадварот, аптымістычна і з цікавасцю шукае выхады з самых складаных сітуацый. Раіцца з дырэктарам сельгаспрадпрыемства, калегамі па працы. Раённае кіраўніцтва таксама дапамагае ў першых кроках яго ў сельгасвытворчасці.
Цікаўлюся, якія планы на будучае. Ці не думае малады спецыяліст праз некаторы час “уцячы” ад вясковага жыцця, ад праблем сельскай гаспадаркі, як гэта здараецца нярэдка ў сельгаспрадпрыемствах? Раман загадкава ўсміхнуўся, пасля адкрыта адказаў:
— Перш хачу падзякаваць кіраўніцтву “Камсамольскай праўды” за дапамогу з жыллёвым пытаннем. Нейкі час прыйшлося жыць на кватэры, пакуль закончылася будаўніцтва трох дамоў. Адзін з іх выдзелілі мне. Умовы добрыя, у доме цёпла. Андрэй Мікалаевіч дапамог прывезці дровы і брыкет. Не хочацца і думаць пра ўцёкі, калі цябе прынялі, як роднага. Падабаюцца Варанцэвічы. Тут ёсць усё неабходнае для жыцця — крама, пошта, амбулаторыя, добры клуб. Але прызнаюся, у планах — прадоўжыць вучобу, атрымаць вышэйшую адукацыю, замацаваць атрыманыя веды на практыцы.
Пажадаем жа Раману далейшых поспехаў у рэалізацыі яго планаў і добрага кар’ернага росту.
А. СЕРАДА.