Любімае месца літоўцаў у Беларусі – паміж Коханавам і Талачыном
Відмантас і Артур – літоўскія грузаперавозчыкі, жывуць у Каўнасе. Мы сустрэлі іх у прыдарожным кафэ “7 вятроў”. Яны тут, аказваецца, частыя госці, едучы праз Беларусь, працяглую стаянку звычайна робяць толькі адзін раз і толькі ў гэтым пункце прыдарожнага сэрвісу.
– З Масквы выязджаем і нідзе не спыняемся, прама сюды, нас тут заўсёды чакаюць і цудоўна сустракаюць.
У адказ на пытанне аб тым, наколькі цікавая для іх такая падзея, як чэмпіянат свету па хакеі, што пройдзе ў Беларусі, пажартавалі:
– Няхай нам тут настольны хакей паставяць, дык тады нам і чэмпіянат свету не спатрэбіцца, мы тут гуляць будзем. А ўвогуле, – сказалі ўжо сур’ёзна, – мы баскетболам захапляемся, мы, літоўцы, – баскетбалісты заўзятыя.
Задавальняюць гасцей асартымент і якасць страў, якія ім прапаноўваюць, абслугоўванне, адносіны персаналу.
– Хочаце – падзяку напішам, – прапанавалі адначасова і прадстаўнікам газеты, і гаспадарам установы.
Але апошнія праявілі сціпласць і папрасілі не турбавацца з такой мэтаю. Гэта і не дзіўна: па-сапраўднаму гасцінны чалавек рады гасцям шчыра і проста так, без ніякага меркантыльнага інтарэсу. А таму і госці любяць такіх гаспадароў, з задавальненнем завітваюць да іх зноў і зноў, у гэтае, калі разабрацца, зусім звычайнае, нічым не адметнае месца з элементарнымі бытавымі выгодамі і не надта маляўнічымі пейзажамі. Бо галоўнае для чалавека – прыязныя адносіны, камфортная атмасфера і цікавыя субяседнікі.
У. МІХАЙЛАЎ.