У Год гасціннасці павінен з’явіцца яшчэ адзін пункт прыдарожнага сэрвісу
Цэлы комплекс аб’ектаў, без якіх не абыходзіцца ні адна дальняя аўтамабільная паездка, павінен з’явіцца сёлета на развязцы паміж трасамі М1 і Р19. У яго склад увойдуць аўтазапраўка, аўтастаянка, кафэ, матэль, крама.
Тэрмін завяршэння будаўніцтва ў адпаведнасці з планам – верасень 2014 года. У цяперашні час на месцы будучага пункту прыдарожнага сэрвісу вядуцца земляныя работы і ўстаноўка некаторых спецыфічных падземных канструкцый. У стварэнні аб’екта задзейнічаны эстонскі капітал, генеральным падрадчыкам з’яўляецца ПВУП “Друць”, заказчыкам – замежнае прадпрыемства “Петрол Систем”.
Да запланаванага завяршэння работ застаецца паўгода. Калі працэс будзе ісці без ніякіх непрадбачаных цяжкасцей, то якраз у Год гасціннасці ў маршрутах замежных падарожнікаў, якія трапілі на тэрыторыю нашага раёна, з’явіцца яшчэ адно цікавае месца, у якім можна адпачыць і вырашыць некаторыя бытавыя і тэхнічныя пытанні, звязаныя з далейшым падарожжам.
У. МІХАЙЛАЎ.
