Захапленне – і дзеля душы, і дзеля заробку
Сяргей Зяцеў з Коханава займаецца дрэваапрацоўкаю. У цяперашні час гэты занятак з’яўляецца для яго яшчэ і крыніцаю заробку (зарэгістраваўся як рамеснік і прапаноўвае свае вырабы на продаж), але пачыналася ўсё з захаплення, са звычайнай цікаўнасці і заняткаў у вольны час дзеля ўласнага задавальнення.
– Давялося пабываць на дрэваапрацоўчым заводзе, – расказвае майстар. – Убачыўшы працэсы, якія там адбываліся, зацікавіўся, загарэўся жаданнем і сам паспрабаваць. Паспрабаваў – спадабалася, стала зацягваць, пачаў набываць інструменты, матэрыялы, станок сабраў з розных запчастак.
Тавары, якія вырабляе Сяргей Аляксеевіч, выглядаюць не горш за фабрычныя: трывалыя, моцныя, гладкія, сіметрычныя – словам, дасканалыя і прывабныя для пакупніка. Асартымент складаюць элементы мэблі, інтэр’еру, разнастайныя гаспадарчыя прылады: паліцы, падстаўкі для кветкавых гаршкоў, табурэткі, тапарышчы, ручкі для дзвярэй, вешалкі, кухонныя рэчы і іншыя прадметы як прыкладнога, практычнага прызначэння, так і эстэтычнага, для ўпрыгажэння. А сама па сабе рамесніцкая дзейнасць, дарэчы, таксама з’яўляецца сінтэзам двух розных, не заўсёды сумяшальных элементаў – творчага і дзелавога, і цудоўна, калі камусьці ўдаецца гарманічна іх спалучыць.
С. АБРАМОВІЧ.
