Перадавікі: “Надзёжына” пабіла ўсе свае рэкорды
19 жніўня на ўборцы збожжавых ва УП “Надзёжына” быў пабіты рэкорд за некалькі апошніх дзесяцігоддзяў. На гэтую прыемную асаблівасць сёлетняй збожжаўборачнай кампаніі звярнуў увагу дырэктар прадпрыемства Кірык М.В. (на здымку злева), які прыняў удзел ва ўручэнні падарункаў райкама прафсаюза тысячнікам.
– Намалот больш за сем тысяч тон, такога не было за ўсю гісторыю саўгаса, – з радасцю паведаміў Міхаіл Васільевіч, віншуючы сваіх работнікаў.
Усяго ў гэты дзень у “Надзёжыне” старшыня райкама прафсаюза Зуева В.І. і спецыяліст райсельгасхарча Талкачоў А.Л. павіншавалі чатыры экіпажы. Тры з іх якраз аказаліся разам на адным полі. Гэта Андрэй Даронін са сваёй дачкою Дар’яй, Уладзімір і Віталь Сімаковы (сын і бацька, праўда, Віталь не змог прыняць віншаванні, бо вымушаны быў адлучыцца), Юрый Станчанка і Уладзімір Кірык.
Надвор’е было няўстойлівае, то прыпякала, то хмарыла, і часу на доўгія размовы не заставалася, таму працаўнікі хутчэй занялі свае месцы – і зноў пайшлі па полі камбайны, прыгінаючы жаткамі расліны і напаўняючы бункеры. Будзем спадзявацца, што пайшлі яны да новых рэкордаў.
Сяргей АБРАМОВІЧ.
