Дапамога сялу: па-суседску жывуць, працуюць, дапамагаюць
Здаецца, зусім нядаўна камбайны ў спякотныя дні рассякалі збожжавыя хвалі на палях. А ўжо першыя восеньскія прыкметы гавораць — нельга траціць час. Менавіта ў гэтыя дні закладваецца ўраджай будучага года.
У ААТ “Жукнева” на мехдвары роўнымі радамі стаяць выканаўшыя свою адказную місію камбайны. Але палявыя работы не спыняюцца. Пад азімыя зерневыя культуры тут адведзена 1350 гектараў.
У выкананні палявых работ дапамогу сельскагаспадарчаму прадпрыемству некалькі гадоў запар аказваюць Талачынская раённая арганізацыйная структура Беларускага таварыства паляўнічых і рыбаловаў і Рацаўскі псіханеўралагічны дом-інтэрнат для састарэлых і інвалідаў. Вось і сёлета Міхаіл Васільевіч Глявіцкі, які працуе санітарам у доме-інтэрнаце і мае спецыяльнасць механізатара, не застаўся ў баку ад дапамогі гаспадарцы. Тым больш, што тут працуе механізатарам яго брат Мікалай. Віктар Віктаравіч Сырадоеў (на здымку) апошнія восем гадоў робіць егерам у паляўніча-рыбалоўнай службе раёна. Да гэтага амаль дваццаць гадоў яго жыццё і дзейнасць былі звязаны з калгасам імя Валадарскага, дзе ён працаваў механізатарам. Жыве ў Жукневе. Роднай гаспадарцы дапамагае і на сяўбе траў, і на правядзенні хімічнай праполкі, і г. д. Зараз на трактары МТЗ-82 вядзе апрацоўку глебы гліфасатамі.
— Норму выконваю, але шмат залежыць ад надвор’я. А ўвогуле, што даручаюць, тое і раблю. Шкада, што менш сёлета давялося працаваць, у летні сезон быў заняты на сваёй осноўнай рабоце, — падзяліўся Віктар.
Вось так па-суседску жывуць, працуюць і дапамагаюць жукнеўцы. Бо родная зямля агульная. А значыць, і клопат аб ёй таксама агульны.
Марыя ХМЯЛЮК.