Фінансавая граматнасць: сёння дзеці, заўтра — кліенты банка
Разлікова-касавы цэнтр №25 у г. Талачыне філіяла ААТ “Белаграпрамбанк” Віцебскага абласнога ўпраўлення з пачатку новага навучальнага года ўключыўся ў рэкламнае мерапрыемства “Твае першыя фінансы”, якое арганізавана ААТ “Белаграпрамбанк” пры падтрымцы Міністэрства адукацыі Рэспублікі Беларусь.
— Урокі фінансавай граматнасці сярод школьнікаў, большасцю гэта тычыцца старэйшых класаў, мы праводзім некалькі гадоў. Сёлетняе мерапрыемства ахоплівае вучняў пятых класаў сельскіх школ у колькасці 85. Пяцікласнікі ўпершыню ўступаюць у новы, дарослы этап свайго жыцця. Ім належыць пазнаёміцца са светам фінансаў, грошай і адказных адносін да іх. Дапамогуць ім у гэтым прывабны персанаж Агрык і яго сябар Алесік, чые прыгоды апісаны ў брашуры “Твае першыя фінансы”. Вельмі займальная і цікавая кніга не толькі для дзяцей, але і дарослых, — расказала намеснік начальніка разлікова-касавага цэнтра Ірына Усціновіч па дарозе на ўрок граматнасці, які прайшоў у Славенскай сярэдняй школе.
— З фінансавай граматнасцю пазнаёміліся і вучні пятых класаў Усвіжбукскага дзіцячага сада-базавай і Кастрычніцкай сярэдняй школ. У астатніх сельскіх школах такія ўрокі належыць правесці настаўнікам. Кожны пяцікласнік акрамя брашуры атрымае, а некаторыя ўжо іх атрымалі, каляндар, расклад урокаў і белыя шарыкі з эмблемай Белаграпрамбанка. Вучні на такіх уроках даведваюцца пра дзіцячыя банкаўскія карткі і ўмовы іх скарыстання, пра спецыяльную праграму “Расці вялікі!”, якая дзейнічае ў рэспубліцы ўжо сем год. Кожнае дзіця, якое стала ўдзельнікам гэтай праграмы і тым самым увайшло ў лік кліентаў банка, на свой дзень нараджэння атрымае падарунак, які мы па жаданні бацькоў можам уручыць дома, у школе ці ў нашым цэнтры. Можна таксама прыняць ўдзел у розыгрышы паездкі ў Дзіснейлэнд, аформіць крэдыт на спецыяльных умовах і бясплатна атрымаць банкаўскую картку, — дадала начальнік аддзела рознічных паслуг Таццяна Атрошчанка.
З цікавасцю слухалі вучні, што такое банк, як ён працуе, якія аперацыі выконвае, якім чынам і дзе можна разлічыцца пры дапамозе банкаўскай карткі за пакупкі, паслугі, як бацькі могуць аформіць крэдыт у банку і іншае цікавае і карыснае са свету фінансаў, без чаго цяжка ўявіць жыццё сучаснага чалавека. Паглядзелі відэафільм, адказалі на пытанні работнікаў цэнтра. Дзякуючы такім урокам дзеці на роўных з дарослымі могуць прымаць удзел у планаванні сямейнага бюджэту і нават штосьці падсказаць бацькам.
Марыя ХМЯЛЮК.
