Выстава: цудоўныя праявы жыцця
Завітаўшы на днях у Талачынскі гісторыка-краязнаўчы музей, была прыемна ўражана карцінамі нашай зямлячкі Іны Матвійчук. Яны кранаюць сваёй сардэчнасцю, пранізаны любоўю да родных мясцін. Нездарма выстаўка таленавітай мастачкі носіць назву “Берагі Друці”.
Гавораць, што каб пазнаць душу мастака, трэба пабываць у родных для яго мясцінах. Тут далёка хадзіць не трэба. Вось яны, рачулкі, парк, апранутыя ў сонечна-жоўтыя сукенкі дрэвы, дзьмухаўцы, бела-ружовая кіпень яблынь… А вось набрынялая макрэчай кара дрэва на беразе рачулкі. Цёмная вада падмывае снегавыя сумёты, увабраўшыя ў сябе шэрасць хмар. Або адліжная пара, пачатак вясны.
Усё гэта блізкія нам краявіды. Нельга адвесці позірк ад узнесеных да блакітнага неба залацістых макавак Пакроўскай царквы на карціне “Вясна ў Талачыне. Вербная нядзеля” (на здымку). Над ёй мастачка працавала некалькі гадоў, і закончыла работу ў 2011 годзе. Але ж царкоўныя купалы зусім нядаўна сталі залацістымі! Вось яно, пачуццё прадбачання, пранікненне ў будучыню.
Міжволі звяртаеш увагу і на падобнае на далоні кляновае лісце, на звісаючаыя пад цяжарам ягад гронкі рабіны, на пацямнелую асеннюю ваду. Душу ахінае супакой.
Іна працуе не толькі ў жанры пейзажа, але і зарэкамендавала сябе як партрэціст. На выстаўцы прадстаўлены аўтапартрэт і партрэт маці. Работы мастачкі знаходзяцца ў асабістых калекцыях у Беларусі і Расіі.
Скарыстацца магчымасцю пазнаёміцца з работамі нашай таленавітай зямлячкі Іны Матвійчук можна да сярэдзіны лістапада. Вы адкрыеце для сябе той цуд у жыцці, які рухае творчасць, абуджае лепшыя чалавечыя пачуцці.
Марыя ХМЯЛЮК.
Выстава: цудоўныя праявы жыцця,
