Майстры Дома рамёстваў пацвердзілі званне народнага клуба
Ніводнае свята ў раённым цэнтры не абыходзіцца без удзелу ў ім таленавітых майстроў Дома рамёстваў. Якіх толькі вырабаў тут не ўбачыш! Кожны з іх можа зрабіць наш дом больш утульным і цёплым — будзь гэта сурвэтка, кошык ці вышываны ручнік…
6 верасня споўнілася 15 год з дня прысваення клубу майстроў і мастакоў-аматараў раённага Дома рамёстваў звання народнага. Напярэдадні гэтай даты клуб прыняў удзел у абласной справаздачнай выстаўцы дэкаратыўна-прыкладнога мастацтва “Карагод талентаў” і пацвердзіў сваё высокае званне. Аб рабоце клуба мы папрасілі расказаць дырэктара Дома рамёстваў Святлану Аляксандраўну Шыцько.
— Кожная выстава — гэта паказчык нашай работы. І мы карыстаемся любой магчымасцю быць там, куды нас запрашаюць. І не толькі ў раёне. Верасень сёлета выдаўся напружаным. Пабывалі ў Круглым на раённых “Дажынках” і ў Гарадку на абласных. Папрацавалі і над упрыгожваннем абочын трас у напрамку Мінска, Круглага, Оршы і Сянно, дзе рулоны з саломы прынялі форму трох парасят, зайца, вусеня, матылька. Каля трохсот работ знаходзяцца на выставе ў абласным метадычным цэнтры народнай творчасці і культурна-асветнай работы. Спадзяёмся, што назад іх вернецца меншая колькасць, бо майстры далі дазвол на іх продаж.
Зразумела, кожнаму з членаў клуба, а іх у нас трыццаць чалавек пад кіраўніцтвам Ларысы Віктараўны Станкевіч, хочацца сваімі вырабамі радаваць людзей не толькі на выставах, але і ў паўсядзённым жыцці. Многія творы знайшлі сваіх прыхільнікаў за мяжой — у Расіі, Ізраілі, Францыі, Германіі, Іспаніі і нават у далёкай Аўстраліі. Асаблівым попытам карыстаюцца вырабы з саломы, лазы. Штогод вясной мы прымаем удзел у вясеннім кірмашы “Вясновы букет” у Лошыцкім парку ў Мінску. Там шмат замежных гасцей, якія вязуць дадому беларускія вырабы як памяць аб гас-ціннай нашай зямлі. Некаторыя цераз сваіх беларускіх знаёмых заказваюць канкрэтна тую ці іншую рэч. Напрыклад, у Калінінград па заказе мы зрабілі дзевяць кветак з саломы і вазу з лазы. Некалькі год таму значную колькасць сувеніраў закупілі ў нас прадпрыемствы прыдарожнага сэрвісу. Цяпер, на жаль, наша сувязь з імі аслабла.
Члены клуба працуюць у розных галінах і сферах. Дзеці займаюцца ў гуртках. Усім знаходзіцца занятак па душы. Мы навучаем майстэрству выцінанкі, пляценню з саломы, лазы, вышыўцы, лепцы з гліны. Цесныя сяброўскія сувязі склаліся з талачынскімі сярэднімі школамі №1 і №2, Варанцэвіцкай, Кастрычніцкай сярэднімі і Райцаўскай дзіцячым садам — пачатковай школамі. З захапленнем і густам дзеці робяць сапраўдныя цуды сваімі рукамі.
Нядаўна ў нас з’явілася магчымасць пашырыць выставачную залу Дома рамёстваў, дзе можна не толькі паглядзець, але і набыць нашы вырабы. Усё большым попытам сярод насельніцтва карыстаюцца ў апошні час вясельныя вышываныя ручнікі, на якія мы прымаем заказы, а таксама сувеніры. Мы рады бачыць у нашых радах новых аматараў і чакаем тых, хто імкненне сваёй душы да прыгожага хоча задаволіць праз цікавы для сябе занятак.
Марыя ХМЯЛЮК.
Майстры Дома рамёстваў пацвердзілі званне народнага клуба,
И постскриптумом надо дописать: людей на фото угадывайте сами, уважаемые читатели. Ну ладно, одного-двух кто-то знает, а остальные кто? Похоже, безымянные групповые фото – это болезнь коллектива районки.