Залаты ўзрост, дастойны павагі і захаплення: Надзеі Брост спаўняецца 100 гадоў
Чатыры гады таму на старонках нашай газеты мы расказалі пра лёс адной з жыхарак вёскі Маціёва. Калі памятаеце, яна рана засталася без маці, расла сіратою пры жывым бацьку. Першы муж у час вайны прапаў без вестак, пакінуў пасля сябе траіх дзяцей. Пасля вайны лёс звёў На-дзею Сцяпанаўну з аўдавеўшым мужчынам, які быў з паволжскіх немцаў. З ім яны нажылі яшчэ траіх дзяцей.
У гэтым годзе, 17 кастрычніка, спаўняецца 100 гадоў з дня нараджэння Надзеі Сцяпанаўны Брост. З шасці яе дзяцей у жывых засталося ўсяго дзве дачкі. Пры ўспаміне аб іх на вочы яе наварочваюцца слёзы. Але ж ёсць чаму і парадавацца жанчыне. Род яе прадаўжаюць 13 унукаў, 21 праўнук, 5 прапраўнукаў. Нашчадкі кожнага пакалення не прамінаюць выпадку наведаць бабулю. Раней яна магла гадзінамі расказваць пра мінулае жыццё, выціраючы хусцінкай мокрыя ад слёз вочы. Памяць яе добра трымала ў сабе дні нараджэння кожнага з дзяцей, значныя падзеі з жыцця.
Больш за дзесяць год Надзею Сцяпанаўну даглядае дачка Марына. На зіму яна забірае маці ў гарадскую кватэру ў Віцебску. Вельмі доўга для Бросціхі (так завуць яе аднавяскоўцы) цягнецца зіма, хочацца зноў вярнуцца ў родную хату, у звыклае вясковае жыццё.
Алена СЕРАДА.
Залаты ўзрост, дастойны павагі і захаплення: Надзеі Брост спаўняецца 100 гадоў,
Страшно пережить своих детей. Здоровья крепкого этой замечательной женщине!!!