Дарожнікам даводзіцца бясконца змагацца з ветрам
Памер дарожнага ўказальніка на трасе М1 недалёка ад сенненскай развязкі — 7,5 на 5,5 метра. А рэльеф у гэтай мясцовасці такі, што знак стаіць на ўзвышэнні сярод палёў і таму адкрыты ўсім вятрам. У выніку супрацоўнікам ДЭУ-8, якое абслугоўвае гэты ўчастак трасы, даводзіцца зноў і зноў аднаўляць указальнік пасля бясконцых пашкоджанняў паветранымі патокамі: то фундамент пакрышыцца, то фермы паламаюцца, то элементы мацавання.
Зменшыць плошчу знака, не парушыўшы патрабаванні адносна памеру шрыфта, немагчыма. Усё, што можна было ўдасканаліць — умацаваць, зацэментаваць і г. д., — спецыялісты ДЭУ-8 ужо зрабілі. Апошні раз аднаўленчыя работы праводзіліся 22 кастрычніка (на здымку). Калі знак зноў не вы-стаіць, то дарожнікам застанецца хіба што прыдумаць і рэалізаваць што-небудзь зусім ужо нестандартнае.
Сяргей АБРАМОВІЧ.
