Дзіцячая бібліятэка: прываблівае непаўторны і багаты свет мастацкага слова
Як вы думаеце, хто наведвае гарадскую дзіцячую бібліятэку? Безумоўна, дашкольнікі, школьнікі малодшых і старэйшых класаў. А яшчэ і дарослыя — студэнты, настаўнікі, жыхары горада і раёна. Работнікі “кніжнага дома” ахвотна знаёмяць усіх з навінкамі літаратуры, запрашаюць прыняць удзел у розных цікавых мерапрыемствах.
На сённяшні дзень у Талачынскай гарадской дзіцячай бібліятэцы налічваецца 1800 чытачоў, з іх 1590 — дзеці ва ўзросце да 15 гадоў. У кніжным фондзе — больш за 20 тысяч экзэмпляраў літаратуры. У мінулым годзе бібліятэку папоўнілі 360 новых кніг, 26 найменняў часопісаў, 9 новых газет.
Свае першыя крокі ў бібліятэчны свет дзеці робяць няўпэўнена. Таму на дапамогу ім прыходзяць вопытныя работнікі ўстановы. Іх задача — адкрыць свет мастацкага слова, выхаваць цікавасць і любоў да кнігі, умець выслухаць кожнага і зразумець. З мэтай азнаямлення штогод тут праводзяцца экскурсіі па бібліятэцы са старэйшымі групамі дзіцячых садоў горада, летнімі аздараўленчымі лагерамі, першакласнікамі.
Да ўвагі юных чытачоў прадстаўлены маляўніча аформленыя кніжныя вы-ставы “Живое слово мудрости духовной”, “Спеў пра Беларусь”, “Казачная краіна”. Можна пачытаць дзіцячыя часопісы “Каламбур”, “Адзін дома”, “Апельсин”, “Веселый зоопарк” і іншыя.
Масавая работа ў бібліятэцы вядзецца ў многіх накірунках і носіць комплексны характар. Амаль кожнае мерапрыемства сумяшчае вусную і наглядную рэкамендацыю выданняў. Кніжная выстава заўсёды суправаджаецца бібліяграфічным аглядам, мерапрыемствы дапаўняюцца міні-спектаклямі.
На базе бібліятэкі арга-нізавана некалькі гурткоў. Пад кіраўніцтвам загадчыцы Аксаны Аляксандраўны Самсонавай працуе лялечны тэатр “Ларчык”, які з’яўляецца частым госцем на святочных мерапрыемствах. У рэпертуары — казачныя прыгодніцкія гісторыі “Дзяўчынка і ліса”, “Як казкі пераблыталіся”, “Непаслухмяная Даша” і іншыя. Драматычны гурток “Мельпамена” ўзначальвае бібліятэкар Ліна Адольфаўна Бабурава. Юныя артысты дэманструюць сваё майстэрства падчас правядзення тыдня кнігі, навагодніх ранішнікаў, праз удзел у міні-спектаклях, забаўляльных праграмах.
З 2007 года кіруе гуртком па пашыве мяккай цацкі “Майстрыха” Алена Пятроўна Кастрыца. Вырабы ўдзельнікаў гуртка ўпрыгожваюць раённыя выставы, выкарыстоўваюцца ў ролі прызоў. Заняткі ў гурт-ках для дзяцей не прахо-дзяць бясследна. Яны дапамагаюць далучыць іх да творчасці, абудзіць фантазію, убачыць у звычайных рэчах непаўторнасць і прыгажосць.
Чатырнаццаць гадоў працуе ў бібліятэцы Раіна Яфімаўна Гіро. Вопытны бібліятэкар, мудрая жанчына, яна добра ведае дзіцячы густ у літаратуры, добразычліва прапануе дзіцяці выбраць патрэбную кнігу, умее знайсці агульную мову з дзецьмі і іх бацькамі.
Алена СЕРАДА.
