У аснове поспеху Насці Лындавай — любоў да роднай мовы і старанная праца
Насця Лындава — вучаніца 10 класа Коханаўскай сярэдняй школы. Сёлета яна заняла трэцяе месца на абласной алімпіядзе па беларускай мове і літаратуры.
Асэнсаваная цяга да паглыбленага вывучэння беларускай мовы і літаратуры ў Насці ўзнікла яшчэ ў пятым класе, калі гэтыя прадметы ў яе пачала выкладаць настаўніца Жанна Леанідаўна Бераснякова. Яна разгледзела ў дзяўчынкі схільнасць да філалагічных дысцыплін і пачала займацца з ёй дадаткова, рыхтаваць да ўдзелу ў раённых і абласных прадметных алімпіядах. І, як бачна, гэта прынесла плён. У мінулым годзе Насці таксама прапаноўвалі прыняць удзел у абласной алімпіядзе, аднак з-за хваробы гэта яна зрабіць не змагла.
Таленавіты чалавек таленавіты ва ўсім. Дзяўчынка паспявае добра вучыцца ў школе мастацтваў па класе фартэпіяна, у школе па розных прадметах. Упершыню ў гэтым навучальным годзе прымала ўдзел у раённай алімпіядзе па грамадазнаўстве, заняла другое месца.
— Насця — таленавітая, працаздольная і вельмі начытаная вучаніца, — кажа Жанна Леанідаўна. — Яна мае трывалую вучэбную базу. З ёй цікава размаўляць, бо разважае як ужо дарослы чалавек. Вылучаецца сярод сваіх аднагодкаў філасофскім поглядам, умее аналізаваць, рабіць высновы, мае асабісты пункт гледжання. Шмат ведае пра родную мову, беларускіх літаратараў і працягвае паглыбляць свае веды ў школьнай бібліятэцы і з дапамогаю інтэрнэту.
Дзякуючы сваёй настойлівасці, высокай канцэнтрацыі ўвагі і вялікаму жаданню перамагчы з лёгкасцю справілася з шэрагам лінгвістычных і літаратурных заданняў, сярод якіх былі, напрыклад, вызначэнне стылю і жанру тэксту, напісанне водгуку, вуснае выказванне і іншыя.
— Тое, што Насця адзі-ная ў раёне вярнулася з абласных алімпіяд з узнагародай менавіта па беларускай мове, адметна і сімвалічна, — працягвае настаўніца. — Добра, што ёсць яшчэ дзеці, якія ёй цікавяцца. Мы жывём у рускамоўным асяродку, у штодзённым жыцці вакол нас гучыць у асноўным руская мова, беларуская ж з’яўляецца фактычна замежнаю для нашых вучняў, аднак на яе вывучэнне даецца менш гадзін, чым на вывучэнне англійскай, нямецкай. Таму ў святле гэтай сітуацыі мая галоўная мэта — навучыць дзяцей паважаць і любіць роднае слова.
— Як адбывалася падрыхтоўка да алімпіяды, з якімі цяжкасцямі вам давялося сутыкнуцца?
— З самага пачатку навучальнага года рыхтавалася даволі сур’езна, — расказвае Насця. — Выконвала алімпіядныя заданні розных гадоў, якія толькі змагла знайсці ў розных крыніцах, чытала беларускую літаратуру. Карысталася інтэрнэтам, дапаможнікамі, распрацоўвала тэмы вуснага выказвання. Разам з настаўніцай мы знайшлі многа цікавых момантаў, якія не ведалі раней па гісторыі мовы, мовазнаўстве.
Алімпіяда праходзіла на працягу пяці дзён. Былі і нечаканасці, складанасці. Выходзячы з аўтобуса, я ўпала на чамаданы. На вусным выказванні выцягнула першы білет і таму вельмі хвалявалася, бо не бачыла, як выступаюць іншыя, не мела аб гэтым уяўлення. Прыемным момантам стаў максімальны бал за водгук сярод усіх 28 удзельнікаў.
— Як лічыш, у чым сакрэт твайго поспеху?
— Беларуская мова — мой любімы прадмет. Яна падабаецца мне сваімі адценнямі слоў, мілагучнасцю. Імкнуся як мага больш прымяняць яе на практыцы, размаўляць па-беларуску з субяседнікамі. Нават калі праходзіла алімпіяда, пяць дзён мы размаўлялі паміж сабой толькі па-беларуску, каментавалі тэлеперадачы, тэлефанавалі родным. Ды і з настаўніцай на занятках сумна не бывае.
Насця добра размаўляе не толькі на беларускай мове, у яе яшчэ выклікае цікаўнасць і англійская. З 9 класа пачала задумвацца аб будучай прафесіі. Жадала стаць перакладчыкам, аднак цяпер пачала сумнявацца ў гэтым выбары. Марыць на наступны год зноў прыняць удзел у абласной алімпіядзе па беларускай мове, а для гэтага кожны дзень займаецца дадаткова.
Юлія КАПРАНАВА.