Стан гульнявых пляцовак у Талачыне месцамі неідэальны, а месцамі нават недапушчальны
У першы дзень лета, які да таго ж з’яўляецца яшчэ і Днём абароны дзяцей, мы вырашылі пацікавіцца тэхнічным станам гульнявога абсталявання на дзіцячых пляцоўках каля шматкватэрных дамоў у Талачыне.
Школьнікам, якія падчас канікулаў не будуць ахоплены працоўнай занятасцю і не паедуць у вёску да бабулі, напэўна, толькі і застаецца праводзіць вольны час на розных турніках ды арэлях. Ды і меншыя дзеці, выхаванцы дзіцячых садоў, у цёплую пару года таксама кожны вечар праводзяць пад наглядам бацькоў на гэтых пляцоўках. А значыць, яны павінны быць, па-першае, забяспечаны дастаткова разнастайным асартыментам абсталявання, а па-другое, знаходзіцца ў спраўным, бяспечным для жыцця і здароўя стане.
ЗАЎСЁДЫ Ў ПОЛІ ЗРОКУ ПРАКУРАТУРЫ
Разам з прадстаўніком пракуратуры — памочнікам пракурора раёна Вакуновым А. А. мы зрабілі аб’езд найбольш буйных гульнявых пляцовак горада. Але не толькі іх, наведалі мы і некаторыя адзінокія горкі ды арэлі ў розных глухіх закутках.
— Пытанне тэхнічнага стану дзіцячых пляцовак мы трымаем на кантролі, — расказаў Алег Алегавіч. — Падчас апошняга маніторынгу давялося вынесці некалькі прадпісанняў, у прыватнасці, па фактах паламанай лаўкі і каруселяў каля дамоў на вуліцы Трактарнай. Абломкі металічных элементаў, якія тырчаць з сапсаваных прыстасаванняў, уяўляюць сабою небяспеку, таму што могуць стаць прычынаю атрымання траўмы.
П’ЯНІЦ І ВАНДАЛАЎ НЕЛЬГА ПАКІДАЦЬ БЕСПАКАРАНЫМІ
За стан пляцовак каля так званых кааператыўных дамоў адказваюць таварыствы ўласнікаў, а каля дамоў, якія знаходзяцца на балансе жыллёва-камунальнага ведамства, — ДП “Талачын-камунальнік”. Зразумела, паламаць абсталяванне або накідаць каля дома смецця могуць не толькі самі яго жыхары, а яшчэ і якія-небудзь хуліганы і п’яніцы з іншых вуліц, якія апынуліся тут у пошуку прыгод або зацішнага месца для распіцця спіртнога. І ў такім выпадку гаспадары дома павінны ў першую чаргу самі паклапаціцца аб абароне сваёй маёмасці.
— Мы спрабавалі гутарыць з жыхарамі, — прыгадаў Алег Алегавіч, — тлумачылі, што як толькі каля дома размесціцца для выпіўкі якая-небудзь кампанія з бутэлькамі, неабходна адразу выклікаць міліцыю. Але грамадзяне трымаюцца нерашуча, не хочуць ускладняць адносіны і нажываць лішнія праблемы. А ў выніку гэтыя п’яніцы і хуліганы адчуваюць усёдазволенасць, успрымаюць свае паводзіны і адсутнасць рэакцыі на іх як належнае, нібыта так і павінна быць.
ЗАБАВЫ МОГУЦЬ ЗАКОНЧЫЦЦА СЛЯЗАМІ
Падчас аб’езду амаль на кожнай дзіцячай пляцоўцы нам давялося зафіксаваць траўманебяспечную сітуацыю з горкамі: край плоскасці, з якой дзеці з’язджаюць, на некалькі сантыметраў падняты над зямлёю, з-за чаго аб яго можна падрапацца (калі горка жалезная) або набіць сіняк (на больш мяккай пластыкавай). Каля адной горкі ў гэтым месцы з зямлі нават тырчалі дзве цэментавыя глыбы (пры ўстаноўцы горка залівалася цементам).
Распаўсюджаным відам парушэння з’яўляецца і неналежны стан пясочніц: дзесьці на іх месцы проста куча пяску, дзесьці замест бартоў — рэшткі трухлявых дошак. Пустой бутэльцы ад гарэлкі таксама не месца там, дзе гуляюць дзеці, тым не менш і такую карціну давялося нам убачыць каля аднаго дома.
А хто і пра што думаў, калі размяшчаў горку і лаўку, зафіксаваныя на здымку? Гэта дарослыя паклапаціліся пра дзяцей, прапанаваўшы ім такую арыгінальную забаву — з’язджаць і з разгону налятаць на жалезнае ламачча?
СТАРОЕ ВЕРНА СЛУЖЫЦЬ, А НОВАЕ ДЫХАЕ НА ЛАДАН
У найлепшым стане застаюцца на дзіцячых пляцоўках у першую чаргу старыя савецкія турнікі, лесвіцы і іншыя падобныя прыстасаванні, якія прызначаны для фізічных практыкаванняў і якія ніяк немагчыма паламаць. А вось сучаснае пластыкавае абсталяванне ды розныя абы-як прыхопленыя зваркаю каруселі дзесьці патрэсканыя, дзесьці пагнутыя, дзесьці разваленыя, а дзесьці яшчэ трымаюцца, але ці надоўга іх хопіць? Каля дома на вуліцы Леніна, 91А, напрыклад, пасля некалькіх тыдняў эксплуатацыі каруселі сталі заядаць і клініць, а кола, за якое па задумцы дзеці павінны брацца рукамі і самі сябе круціць, адвалілася.
* * *
Па ўсіх выяўленых падчас аб’езду негатыўных фактах, паведаміў Алег Вакуноў, будуць прыняты меры пракурорскага рэагавання: адказныя службовыя асобы атрымаюць прадпісанні, а ў выпадку іх невыканання — штрафы.
Сяргей АБРАМОВІЧ.
Стан гульнявых пляцовак у Талачыне месцамі неідэальны, а месцамі нават недапушчальны,
