Жыхар Зялёнага Бора загарэўся ідэяй самаробных спартыўных трэнажораў
Цэны на спартыўныя трэнажоры ў розных інтэрнэт-каталогах Беларусі вагаюцца ад 1,5 мільёна да некалькіх дзясяткаў мільёнаў рублёў. Зразумела, сума на цэнніку залежыць ад узроўню складанасці прыстасавання, ад яго функцыянальнасці, а значыць, чым больш высокатэхналагічны трэнажор, тым большыя грошы давядзецца выкласці за яго.
Жыхар вёскі Зялёны Бор Ігар Івашчанка вырашыў пайсці іншым шляхам. Трэнажоры ён пачаў вырабляць сам.
— Па адукацыі я настаўнік фізкультуры, — расказаў Ігар Васільевіч. — Хоць і не працую па спецыяльнасці, але спортам цікаўлюся, да таго ж мая жонка выкладае фізкультуру ў Коханаўскай сярэдняй школе, так што тэмы здаровага ладу жыцця, трэніровак, спаборніцтваў, спартыўных перамог і расчараванняў у нас заўсёды на слыху. Я з цікаўнасцю слухаю расповеды жонкі аб яе працы, аб поспехах яе выхаванцаў і аб праблемах фарміравання ў маладога пакалення любові да спорту. А неяк, пабываўшы ў трэнажорнай зале нашага спарткомплекса “Пульс”, загарэўся ідэяй стварыць сваю асабістую базу для трэніровак. Гэта значна зручней, чым наведваць афіцыйную ўстанову і залежаць ад графіку яе работы, наяўнасці свабодных месцаў і іншых фактараў.
На цяперашні момант Ігар Васільевіч вырабіў адзін трэнажор (на здымку) для трэніровак пярэдняй і задняй паверхняў бядра. У планах — яшчэ некалькі канструкцый.
— Калі мне ўдасца рэалізаваць усе свае ідэі, то я думаю, што атрымаецца комплекс трэнажораў, якія развіваюць групы мышцаў, важных для спартсменаў у лёгкай атлетыцы.
Праўда, увасобіць ідэі ў жыццё адразу пасля таго, як яны нарадзіліся ў галаве, немагчыма, бо для вырабу надзейных і даўгавечных трэнажораў неабходны якасныя матэрыялы, а іх на сметніку не знойдзеш і на базары за капейкі не купіш. Ігар Васільевіч пусціў на першы трэнажор усе прыдатныя для гэтага жалезныя трубы і металапрофіль, якія знайшліся ў яго гаспадарцы, і пакуль што рашае пытанне, дзе ўзяць матэрыялы для далейшай працы:
— Трубы, швелеры, металапрофіль — калі ўсё гэта купляць, то расходы атрымаюцца не меншыя, чым пры набыцці гатовага трэнажора. Спадзяюся знайсці аднадумцаў або проста сустрэць неабыякавых людзей, у якіх завалялася што-небудзь з вышэйпералічаных матэрыялаў, не патрэбнае ім самім. Буду ўдзячны, калі хто-небудзь падзеліцца кавалкам металалому, які для мяне з’яўляецца не непатрэбным ламаччам, а каштоўным матэрыялам. Каго зацікавілі мае ідэі, той можа звязацца са мною па тэлефонах 2-94-78, 8029-810-99-71.
Сяргей АБРАМОВІЧ.
А еще надо данные самоделки сертифицировать.