Для ўдзельнікаў “Дажынак” пачалі шыць касцюмы
Пакуль будаўнікі і дарожнікі вядуць работы па падрыхтоўцы месца правядзення свята — рамантуюць дамы і вуліцы райцэнтра, спецыялісты іншых профіляў працуюць над святочнай праграмай, рашаюць шматлікія пытанні арганізацыйнага і творчага характару. Напрыклад, коханаўскі Дом быту займаецца пашывам касцюмаў.
— Рыхтуем адзенне для ўдзельнікаў, якія будуць іграць ролі разнастайных сельскагаспадарчых раслін, — паведамілі ў швейным цэху. — Швяя Наталля Шарай (на здымку) ужо завяршае работу над касцюмам бульбіны.
Калі весці гаворку не пра сельскую гаспадарку ў цэлым, а толькі ў разрэзе Талачынскага раёна, то бульба асацыіруецца ў першую чаргу з кансервавым заводам. І ў святле гэтай акалічнасці ўзнікае пачуццё інтрыгі: цікава, якія яшчэ персанажы палёў і фермаў будуць прадстаўлены на свяце і якія функцыі будуць яны выконваць у яго праграме. Дачакаемся — пабачым.
Сяргей АБРАМОВІЧ.
