Сяўба азімых: насення хапае, слабыя месцы — удабрэнні і арганізацыя работ
Сяўба азімых зерневых у самым разгары, па стане на панядзелак у цэлым па раёне было засеяна 5994 гектары з запланаваных 14600, што складае 41,1%. Як паведаміла намеснік начальніка райсельгасхарча па раслінаводстве Красоўская А. Л., у ідэальным варыянце трэба завяршыць работы дзесьці да 25 верасня, але пры ўмове спрыяльнага надвор’я можна лічыць дапушчальным і тэрмін 1 кастрычніка.
— Найбольш паспяхова ідуць работы ў сельгаспрадпрыемствах “Слаўнае” (план выкананы на 98%), “Абольцы” (45%), “Каралькі” і “Рыдамльскі” (41%), — расказала Аксана Леанідаўна. — У іншых гаспадарках у параўнанні з імі назіраецца адставанне. Прычынамі затрымак з’яўляюцца ў першую чаргу выхад са строю тэхнікі і нездавальняючая арганізацыя работ. У некаторых выпадках, напрыклад, можна было б падоўжыць працоўны дзень — раней выехаць у поле і пазней вярнуцца.
У гэтым годзе, па словах нашай субяседніцы, у выніку аптымізацыі структуры ворыва пад азімыя зерневыя адведзены меншыя плошчы, чым у мінулым (летась было амаль 20000 гектараў). Зроблена гэта з мэтаю выканання тэхналагічных рэгламентаў (улік культур-папярэднікаў і іншых фактараў) і, як вынік, дзеля забеспячэння найбольшай ураджайнасці.
Насеннем сельгаспрадпрыемствы забяспечаны. У прыватнасці, паспяхова вытрымліваюцца паказчыкі па завозе эліты: замест запланаваных 360-ці тон завезена 500. А вось сітуацыя з мінеральнымі ўдабрэннямі выглядае горш. Так, па стане на 21 верасня забяспечанасць імі складала толькі 38%.
Як сяўбою, так і перадпасяўною апрацоўкаю глебы сельгаспрадпрыемствы займаюцца ў асноўным самастойна, але некаторым з іх аказваецца і дапамога звонку. Напрыклад, расказала Аксана Леанідаўна, прадпрыемства меліярацыйных сістэм дапамагала з узворваннем “Камсамольскай праўдзе”, “Талачынскай Навінцы”, “Райаграсэрвісу”.
Ацэньваючы ў цэлым ход сёлетняй азімай сяўбы, Аксана Леанідаўна адзначыла, што сельгаспрадпрыемствам неабходна мабілізавацца і знайсці рэсурсы для выканання ўсіх работ у поўным аб’ёме і ў адведзены тэрмін.
Сяргей АБРАМОВІЧ.