Дзве маленькія крамы заўважна павялічылі наш выбар
У сярэдзіне снежня БелТА паведаміла аб тым, што Інстытут эканомікі Нацыянальнай акадэміі навук Беларусі вызначыў гандлёвую сетку гіпермаркетаў з самымі нізкімі коштамі. Згодна з вынікамі даследаванняў, найбольш даступным для пакупнікоў аказаўся “Еўраопт”.
Хоць у Талачыне гэтая гандлёвая сетка прадстаўлена небагата, дзвюма цесненькімі крамамі, усё ж іх адкрыццё стала заўважнаю падзеяй, якая ўзрадавала жыхароў напрыканцы года. Многія з нас даўно ўжо ездзілі закупацца ў Круглае, аддавалі перавагу “Еўраопту”, знаходзячыся праездам у іншых гарадах. І адразу пасля таго, як дзве гандлёвыя кропкі адчыніліся ў Талачыне, на касах у руках пакупнікоў замільгалі дысконтныя карткі, якія, аказваецца, даўно ўжо ляжалі ў кашальках.
Асартымент талачынскіх “Еўраопцікаў”, канечне, не параўнаеш з асартыментам, прадстаўленым у Оршы, Віцебску, Круглым, Барысаве, Мінску. Тым не менш пастаянная запоўненасць гэтых крамаў пераканаўча сведчыць аб іх папулярнасці і запатрабаванасці, а з’яўленне новага іграка на рынку можна разглядаць толькі як прыемную навіну: расце канкурэнцыя, у кліентаў пашыраецца выбар.
Сяргей АБРАМОВІЧ.
