Каталіцкія вернікі адзначылі свята Божага Нараджэння
У маленькім жолабе на сене ляжыць народжаны Езус. З замілаваннем глядзіць на Божага Сына яго маці – Прасвятая Дзева Марыя. Перад ім стаяць на каленях парафіяне касцёла св. Антонія Падуанскага ў г. Талачыне. Малітвы аб пасланні спакою на зямлю, здароўя і ўсяго самага найлепшага родным і блізкім людзям, дараванні правінаў, радасць і жалоба душы — усё гэта прыносіцца ў дар маленькаму Езусу — цэнтру нашых жаданняў, радасці і збаўлення.
Павіншаваць каталіцкіх вернікаў са святам Божага Нараджэння прыйшлі вучні талачынскай дзіцячай школы мастацтваў. З захапленнем слухалі людзі калядныя песні ў выкананні хору пад кіраўніцтвам Святланы Ерашовай. Звонкія дзіцячыя галасы ўзляталі ўвысь пад скляпенні старажытнага храма, напаўнялі яго і сэрцы прысутных радасцю і ўдзячнасцю.
Марыя ХМЯЛЮК.