У лагеры весела і карысна для здароўя
Па даведзеным плане за летні перыяд на тэрыторыі раёна сёлета павінны адпачыць 700 вучняў. На даны момант працуюць сем аздараўленчых прышкольных лагераў дзённага прабывання, тры 9-дзённых лагеры кругласутачнага прабывання, лагер працы і адпачынку. На базе спартыўна-аздараўленчага комплексу “Ніва” набіраюцца сіл вучні школ раёна.
Выхаваўчая работа кожнага з лагераў спланавана ў адпаведнасці з пэўным профілем. Напрыклад, 9-дзённы лагер кругласутачнага прабывання ў Забалацкай сярэдняй школе сумесна з раённым аддзелам унутраных спраў працуе ў сацыяльна-прававым накірунку. Ваенна-патрыятычны профіль мае лагер на базе Усвіжбукскай базавай школы-дзіцячага саду. Выхаванцы аздараўленчага лагера Коханаўскай сярэдняй школы пашыраюць веды ў эколага-біялагічным напрамку.
У пачатку чэрвеня старшакласнікі гарадскіх школ сабраліся ў лагеры працы і адпачынку на базе сярэдняй школы №1 г. Талачына. Адзін з атрадаў задзейнічаны пры Свята-Пакроўскім манастыры, дзяўчаты другога шыюць пасцельную бялізну. Астатнія тры атрады працуюць у прамысловым садзе Талачынскага кансервавага завода.
Сёлета ў лагеры “Сонейка”, які працуе на базе Славенскай сярэдняй школы, аздараўляецца 41 вучань з 1 — 7 класаў. У першую чаргу сюды былі залічаны адораныя дзеці, з мнагадзетных сем’яў і тыя, хто знаходзіцца ў сацыяльна-небяспечным становішчы.
Як паведаміла начальнік лагера Юлія Аляксандраўна Уліціна, прыярытэтным накірункам у выхаваўчай рабоце з’яўляецца фарміраванне ў вучняў навыкаў здаровага ладу жыцця. З гэтай мэтай кожны дзень арганізоўваюцца мерапрыемствы, максімальна накіраваныя на ўмацаванне здароўя школьнікаў — спартыўныя спаборніцтвы, гульні на свежым паветры, спартландыі, віктарыны на тэму здаровага ладу жыцця і іншыя.
Прабыванне дзяцей праходзіць па ўстаноўленым рэжыме. У меню ўключаны стравы, насычаныя карыснымі вітамінізаванымі прадуктамі. Кожны дзень дзеці з задавальненнем спажываюць фрукты і сокі, не абыходзіцца і без ласункаў. На васямнаццаць дзён адпачынку ў лагеры на кожнае дзіця выдзелена сума ў 660 тысяч рублёў.
Алена СЕРАДА.
