Талачынскі элеватар: няспыннае тэхнічнае развіццё — умова эфектыўнай гаспадарчай дзейнасці
Даўно ўжо стала нязменнаю традыцыяй тое, што ў новы сезон ААТ “Талачынскі элеватар” уваходзіць з нейкімі тэхналагічнымі новаўвядзеннямі, накіраванымі на павышэнне эфектыўнасці вытворчага працэсу і эканомію рэсурсаў. Прычым дасягаюцца гэтыя мэты не толькі за кошт набыцця новага абсталявання, а яшчэ і дзякуючы творчаму падыходу кіраўніцтва і інжынернай службы прадпрыемства да вырашэння разнастайных тэхнічных і арганізацыйных пытанняў і пераадолення праблем.
Дзякуючы такім спецыялістам, як галоўны інжынер Карпушэвіч В. Л., галоўны механік Драняеў П. С., вядучы энергетык Радзівонаў В. Ф. і іншыя кампетэнтныя і неабыякавыя людзі, вытворчая база заўсёды знаходзіцца ў належным тэхнічным стане і адпавядае патрабаванням часу ў плане энергаэфектыўнасці, бяспекі, зручнасці выкарыстання. На рахунку вышэйназваных людзей ужо нямала свайго роду вынаходніцтваў, якія спрашчаюць і робяць больш рацыянальным працэс прыёму, ачысткі, сушкі зерня і транспарціроўкі яго на захоўванне, удасканальваюць некаторыя іншыя тэхналагічныя працэсы ў рамках гаспадарчай дзейнасці прадпрыемства.
Напрыклад, сёлета ўпершыню будзе выкарыстоўвацца аўтаматызаваная сістэма з пультам кіравання маршрутамі зерня. Раней прыёмшчык на пункце разгрузкі аўтамабіляў тэлефанаваў работнікам, якія знаходзяцца ўнутры элеватара, і паведамляў, якую лінію яны павінны задзейнічаць для прыёму толькі што прывезенай партыі зерня. Цяпер жа чалавек сам запусціць гэтую лінію, проста націснуўшы адпаведныя кнопкі на пульце кіравання, і па індыкатарных лямпачках на ім пераканаецца, што зерне пайшло правільным напрамкам, на патрэбныя ўчасткі. Сістэма створана поўнасцю сіламі работнікаў прадпрыемства, выпрабавана і чакае жніва.
У 2012 годзе з мэтаю зніжэння нагрузкі на норыі і іншыя элементы транспарціроўкі зерня па вытворчых лініях быў уведзены ў дзеянне адзін самаробны канвеер, а сёлета побач з ім пачне дзейнічаць яшчэ адзін. І абодва яны маюць больш дасканалую канструкцыю ў параўнанні з аналагічнымі канвеерамі фабрычнай вытворчасці. У прыватнасці, дзякучы пад’ёму падтрымліваючых валікаў з 45 да 60 градусаў стужка транспарцёра больш згінаецца (па даўжыні, накшталт жолабу) і ўмяшчае большы аб’ём зерня, а спрашчэнне нацягвальнай канструкцыі ў канцы лініі павялічвае хуткасць руху транспарцёра.
Акрамя таго, калі раней кабель, які падае электрычнасць на разгрузачны вазок (гэтае прыстасаванне ездзіць уздоўж канвеера па жалезных рэйках), ляжаў на падлозе, і работнік павінен быў, трымаючы яго ў руках, хадзіць следам за вазком, то цяпер гэты кабель падвешаны зверху, над канвеерам, і ў кантролі за ім з боку персаналу няма патрэбы.
З мэтай эканоміі энергарэсурсаў некалькі гадоў таму пачата выкарыстанне адходаў ачысткі збожжа ў якасці паліва для кацельні, а сёлета ўстаноўлены яшчэ і сонечны калектар: размешчаныя на даху 4 невялікія панэлі (у кожнай па 20 трубак са спецыяльным напаўняльнікам) за кошт энергіі сонца награюць 800 літраў вады.
У 9 гадзін раніцы, калі адбывалася наша гутарка, сонца яшчэ грэла не на ўсю моц, але вада ўжо мела тэмпературу 52 градусы. Побач з 800-літровым рэзервуарам стаіць яшчэ адзін, самаробны, умяшчальнасцю 2000 літраў, а ў яго ўманціраваны змеявік, па якім плануецца пускаць ваду, нагрэтую сонечным калектарам (па замкнутым коле), і такім чынам цяперашні 800-літровы бак з калектарам ператворыцца ў свайго роду сонечную кацельню для нагрэву дзвюх тон вады.
Па словах галоўнага механіка Пятра Драняева, награваць ваду калектар зможа і зімой, толькі слабей, а тэрмін яго службы фактычна неабмежаваны пры ўмове своечасовай перыядычнай замены напаўняльніка трубак.
Акрамя ўласна вынаходніцтваў (сваіх, асабістых тэхнічных новаўвядзенняў і самастойна створаных канструкцый), шмат робіцца па мадэрнізацыі вытворчасці: старое абсталяванне мяняецца на новае, у большасці вытворчых памяшканняў праведзена замена асфальтавай падлогі на наліўную (цэментавая з гладкім палімерным пакрыццём) і г. д. Колькасць ідэй, прапанаваных і рэалізаваных інжынернаю службаю Талачынскага элеватара, уражвае.
Звяртаюць на сябе ўвагу такія ўласцівыя работнікам прадпрыемства якасці, як творчы падыход да выканання сваіх задач, энтузіязм, глыбакадумнасць, нястомнасць у імкненні да ўдасканалення свайго ўчастка работы. Хаця, калі разабрацца, па-іншаму не можа быць, любое прадпрыемства, якое займаецца матэрыяльнаю вытворчасцю і імкнецца да забеспячэння высокай эфектыўнасці гаспадарчай дзейнасці, не павінна стаяць на месцы ў сваім тэхнічным развіцці.
Сяргей АБРАМОВІЧ.
НА ЗДЫМКУ: вядучы энергетык Віктар Радзівонаў расказвае пра пульт кіравання маршрутамі зерня.